როგორც უკვე იცით, ჯიმ კერის ყოფილი შეყვარებულის დედა მსახიობს შვილის სიკვდილში ადანაშაულებს და ამბობს, რომ სწორედ ჯიმმა მიიყვანა უაითი თვითმკვლელობამდე.

“ოჯახს სურს, რომ მსოფლიომ იცოდეს სიმართლე იმის შესახებ, თუ ვინ არის სინამდვილეში ჯიმ კერი. ეს ის მამაკაცია, რომელიც თქვენს ქალიშვილს სამ ვენერიულ დაავადებას გადასდებს, ამის შესახებ ტყუილებს იტყვის, თქვენს შვილს დაამცირებს, მის ძვირადღირებულ ადვოკატებს გამოიყენებს და ბევრ ფულს გადაუხდის იმისთვის, რომ ის და მისი ოჯახი გააჩუმოს, ბოლოს კი, არალეგალურ წამლებს მისცემს, რაც საბოლოოდ თქვენს შვილს მოკლავს”, ამბობდა კატრიონას დედა ბრიჯიტი უაითი.

ამავე მიზეზით, სარჩელი გასული წლის სექტემბერში კატრიონას მეუღლემ მარკ ბარტონმაც შეიტანა და თქვა, რომ მის ცოლს ჯიმი იმ წამლებით ამარაგებდა, რომლებიც მან საბოლოოდ თვითმკვლელობისთვის გამოიყენა.

როგორც ჯიმ კერის ადვოკატები ამბობენ, იმ შემთხვევაში თუ კატრიონას დედა სასამართლოზე სიმართლეს ვერ დაამტკიცებს, მას, ტყუილი ბრალდებებისა და ცილისწამებისათვის, მსახიობისთვის $372 ათასის გადახდა მოუწევს.

პროცესი 2018 წლის 26 აპრილს არის ჩანიშნული.

30 წლის კატრიონა უაითი 2015 წელს, ლოს-ანჯელესში წამლების გადამეტებული დოზის მიღების შემდეგ გარდაიცვალა.