ბიჰევიორიზმის მკვლევრები ახლახან გახმაურებულმა ფაქტმა ირონიულ ვითარებაში ჩააგდო: ჰარვარდის პროფესორს, რომელიც წლების განმავლობაში პატიოსნებას იკვლევდა, კოლეგებმა მონაცემთა გაყალბებაში დასდეს ბრალი. ფრანჩესკა ჯინოს წინააღმდეგ, რომელიც ჰარვარდის ბიზნეს სკოლის ერთ-ერთ გამოჩენილ პროფესორად ითვლება, ბრალდებების რაოდენობა დღითიდღე იზრდება.

16 ივნისს ჰარვარდის ბიზნეს სკოლის პროფესორმა მაქს ბაზერმანმა უნივერსიტეტს აცნობა, რომ 2012 წელს გამოქვეყნებულ ნაშრომში, რომლის თანაავტორიც მასთან ერთად ჯინოც იყო, კვლევის შედეგები გაყალბებულია. ბაზერმანის თქმით, ნაშრომისთვის ჩატარებულ ერთ-ერთ კვლევაში, რომელსაც ჯინო ხელმძღვანელობდა, მონაცემები დამატებულია.

ნაშრომი, რომლის თანაავტორებიც ჯინოს მონაცემებს გაყალბებულად თვლიან, ასეთ რამეს ამტკიცებდა: როცა ადამიანებს დოკუმენტის დასაწყისში სთხოვენ, საგადასახადო და სადაზღვევო ინფორმაცია მიუთითონ, უფრო პატიოსნად ავსებენ მას, ვიდრე მაშინ, როცა ამ ინფორმაციის მითითებას დოკუმენტის ბოლოში სთხოვენ. ამის მიზეზი კი ისაა, რომ საკუთარი ფინანსური ინტერესების გამო, ადამიანები შემოსავლებთან დაკავშირებით ხშირად ცრუობენ.

ბაზერმანმა უნივერსიტეტს 14-გვერდიანი დოკუმენტი წარუდგინა, რომელიც ჯინოს მიერ მონაცემების გაყალბების მტკიცებულებებს ასახელებს. ნაშრომის სხვა თანაავტორებიც ადასტურებენ, რომ კვლევის დასრულებამდე მონაცემთა ბაზაში ვიღაცამ შეაღწია და მონაცემების ფაილში შედეგები დაამატა. რაც შეეხება ბრალდებულ პროფესორს, მას მედიასთან კომენტარი არ გაუკეთებია, უნივერსიტეტის ვებგვერდის მიხედვით კი, ის შვებულებაშია.