რა ხდება რუსეთში: გუშინ ვაგნერის ხელმძღვანელმა, ევგენი პრიგოჟინმა განაცხადა, რომ მათი პოზიციები დაბომბა რუსული არმიის დანაყოფებმა ზურგიდან დაბომბეს, ამიტომ 25 000-იანი ჯგუფით შურისძიება დააანონსა.

  • ტრადიციულად, რუსეთის თავდაცვამ ამას ტყუილი და პროვოკაცია უწოდა მის წინააღმდეგ კი აღიძრა საქმე შეიარაღებული აჯანყებისკენ მოწოდებაზე.
  • თავად პრიგოჟინი ამბობდა, რომ "ეს არ არის სამხედრო გადატრიალება, ეს არის სამართლიანობის მარში".
  • გვიან ღამით მან განაცხადა, რომ ვაგნერელებმა რუსეთის საზღვარი ყველა ადგილას გადაკვეთეს და როსტოვში შედიან, დილას კი თქვა, რომ როსტოვში ყველა სამხედრო პუნქტს აკონტროლებენ და მოსკოვისკენ მიდიან.
  • მოსკოვში, მოსკოვისა და ვორონეჟის ოლქებში კონტრტერორისტული ოპერაციის რეჟიმი ამოქმედდა.

დეტალები: დღეს ოპოზიციის წარმომადგენლებმა განაცხადეს, რომ მიმდინარე მოვლენების გამო რუსეთთან საზღვარი უნდა ჩაიკეტოს. ამ მოწოდებებს სოციალურ ქსელში მოქალაქეებიც ავრცელებენ.

  • "მოვუწოდებ საქართველოს მთავრობას, მოიწვიოს უსაფრთხოების საბჭო და დაიცვას ქვეყნის ინტერესები! არაპროგნოზირებადი ვითარების გათვალისწინებით და სახელმწიფოს უსაფრთხოების დაცვის მიზნით, დროებით ჩაიკეტოს საზღვრები რუსეთთან. საფრთხე რეალურია! საქართველოს სახელმწიფო საზღვარი — ლარსის სასაზღვრო-გამშვები პუნქტი ყველაზე ახლო წერტილია გამწვავების ზონასთან", — განაცხადა გიორგი გახარიამ.
  • პრეზიდენტმა დაწერა, რომ ჩვენი საზღვრები ზედმიწევნით უნდა გაკონტროლდეს, მიგრაციის შესაძლო ახალი ტალღების გათვალისწინებით.

რას ამბობს შსს: უწყების განცხადებით, 24 ივნისის მდგომარეობით, სასაზღვრო გამშვებ პუნქტ დარიალზე მუშაობა მიმდინარეობს ჩვეულ რეჟიმში და მგზავრთა და ავტომობილთა ნაკადების ზრდა არცერთი მიმართულებით არ ფიქსირდება.

  • "შინაგან საქმეთა სამინისტროს, შესაბამისი დანაყოფების მხრიდან სიტუაცია სრულად კონტროლდება, მიმდინარეობს არსებული მდგომარეობის ანალიზი და ამ ეტაპზე, საზღვრის დაკეტვის, ან სხვა ღონისძიებების გატარების საჭიროება არ არის", — ვკითხულობთ განცხადებაში.