კულტურის მინისტრისა და აკადემიის რექტორის სახელზე სტუდენტებმა ღია წერილი გაავრცელეს.

რატომ არის მნიშვნელოვანი: სტუდენტები ეჭვქვეშ აყენებენ სამხატვრო აკადემიის დამოუკიდებლობას და გმობენ თეა წულუკიანის უხეშ და უმიზეზო ჩარევებს საგანმანათლებლო პროცესში.

  • მათი განცხადებით, გასული წლის გაზაფხულიდან აკადემიაში მიმდინარეობს რეორგანიზაცია, რომლის ფარგლებშიც სამინისტრო უსაფუძვლოდ ერევა და აზიანებს ქვეყნისთვის მნიშვნელოვანი დარგების შემსწავლელ ფაკულტეტებს, კერძოდ, ხელოვნებათმცოდნეობისა და რესტავრაციის სასწავლო პროგრამას.
  • სამხატვრო აკადემიის სტუდენტები არ იზიარებენ და პრინციპულად ეწინააღმდეგებიან უნივერსიტეტში დაგეგმილ ცვლილებებს.

სტუდენტები აპროტესტებენ: რესტავრაციის სტუდენტების თაბუკაშვილის სახელოსნოდან უმიზეზოდ გამოყრას სასწავლო სემესტრის შუაში (2022 წლის მაისი) და შესაბამისი სამუშაო პირობების გარეშე, გაუმართავ შენობაში გადაყვანას;

  • ხელოვნების ისტორიის მისაღები ადგილების ოციდან ხუთ ადამიანამდე ჩამოყვანას;
  • ფაკულტეტის დაშლის პირდაპირს მცდელობას — რესტავრატორების სახვით ფაკულტეტთან მიერთებით ან ცალკე ფაკულტეტად ჩამოყალიბებით;
  • ახალი პროგრამის ფარგლებში რესტავრაციის სტუდენტებისთვის კრედიტების უარყოფასა და იძულებითი სემესტრის დამატებას;
  • რესტავრაციის სტუდენტებისთვის თეორიული საგნების გაუქმებას.

სტუდენტების შეფასებით, ახალი პროგრამა მიმართულია არა სწავლის ხარისხის გაუმჯობესებისკენ, არამედ გზადაგზა მიღებული და ერთმანეთზე უარესი გადაწყვეტილებების ნაზავია.

  • "რატომ არის პრიორიტეტი აბიტურიენტების მიღება და არა უკვე ჩარიცხული სტუდენტების ბედი, რომელთა უმეტესობასაც ამის გამო დამატებითი შრომა და მაღალ ბინის ქირებთან გამკლავება უწევთ", — წერენ ისინი.