ადიგენის გამგებლის ზაქარია ენდელაძის ინფორმაციით, მუსლიმებსა და ქრისტიანებს შორის შეთანხმება მიღწეულია და მათთვის საერთო სასაფლაო გაიხსნება:

"ტერიტორია უკვე შერჩეულია. არსებული სასაფლაო გაფართოვდება და მისით ორივე მხარე ისარგებლებს".

ჭელის მინარეთის წინამძღვრის ჯამბულ აბულაძის თქმით, საერთო ტერიტორია ორ ნაწილად გაიყოფა და გამიჯნული იქნება მუსლიმებისა და ქრისტიანების სასაფლაოები.

"დავათვალიერეთ და მშვენიერი ადგილია. მას სხვადასხვა შესასვლელი ექნება მუსლიმებისთვისა და ქრისტიანებისათვის. ორივე მხარე კმაყოფილია და ჩვენი მოვალეობაა, რომ ურთიერთშერიგებით ხელი გვინდა შევუწყოთ ერთმანეთს" - გვითხრა საუბარში სამცხე-ჯავახეთის მუფთმა მამუკა ვაშაყმაძემ.

მუფთმა აღნიშნა, რომ დაპირისპირებული მხარეები მეზობლები არიან და მათ უკვე მოუწოდა, რომ რელიგიისა და სასაფლაოს გამო ერთმანეთს შეურაცხყოფა აღარ მიაყენონ:

"იქნება ისევ ჰარმონიული ცხოვრება, მე ასე ვფიქრობ".

29 თებერვალს სოფელ ადიგენში ქრისტიან და მუსლიმ მოსახლეობას შორის სასაფლაოს ტერიტორიის გამოყოფასთან დაკავშირებით დაპირისპირება დაიწყო. ადგილობრივი მოსახლეობის ნაწილი მუსლიმ თანამოქალაქეებს რელიგიური მოტივით სასაფლაოს ცალკე მოწყობის საშუალებას არ აძლევს. უთანხმოება ფიზიკურ ანგარიშსწორებაში გადაიზარდა. დაზარალებულია 3 მუსლიმი, მათგან ერთ-ერთი კი საავადმყოფოში გადაიყვანეს.

გამოძიება სისხლის სამართლის კოდექსის 156-ე მუხლის პირველი ნაწილით დაიწყო, რაც ადამიანის სიტყვის, აზრის, სინდისის, აღმსარებლობის, რწმენის ამ მრწამსის გამო დევნას ანდა პოლიტიკურ, საზოგადოებრივ, პროფესიულ, რელიგიურ ან მეცნიერულ მოღვაწეობასთან დაკავშირებულ დევნას გულისხმობს და ისჯება ჯარიმით ან თავისუფლების შეზღუდვით/თავისუფლების აღკვეთით ორ წლამდე.

შს სამინისტროს პრესსამსახურის ინფორმაციით, ინციდენტის შემდეგ არავინ დაუკავებიათ, თუმცა მიმდინარეობს დაპირისპირებაში მონაწილე პირების დაკითხვა. გამოძიება მიმდინარეობს.