რატომ არის მნიშვნელოვანი: ღარიბაშვილმა დღეს მორიგი საერთაშორისო ტრიბუნა ისევ ანტიდასავლური განცხადებების გასაკეთებლად გამოიყენა, რაც დასავლელი პოლიტიკოსების მხრიდან კრიტიკის საგანი გახდა.

  • გლობალური უსაფრთხოების ფორუმზე ქვეყნის პრემიერმინისტრმა რუსეთის მიერ უკრაინაში სრულმაშტაბიანი აგრესიის წამოწყების ერთ-ერთ მიზეზად NATO-ში გაწევრიანების სურვილი დაასახელა.
  • ასევე, არ უპასუხა მკაფიოდ კითხვას, იყო თუ არა აგვისტოს ომი პროვოცირებული, ამის ნაცვლად თქვა, რომ დეტალებზე საუბრისგან თავს შეიკავებს და ქართული ოცნება 2008 წელს ხელისუფლებაში რომ ყოფილიყო, "ამის ასაცილებლად ყველაფერს გააკეთებდა".
  • უსამართლო, დაუსაბუთებელი და არამიზანშეწონილი უწოდა ევროკომისიის გადაწყვეტილებას, საქართველოსთვის კანდიდატი ქვეყნის სტატუსის არმინიჭებაზე, ხოლო "უშველებელი პოლიტიკური შეცდომა" თუ ქვეყანა სტატუსს ისევ ვერ მიიღებს.

დეტალები: "Говорит Москва. [ლაპარაკობს მოსკოვი]", — ასე გამოეხმაურა ერვოპარლამენტარი რასა იუკნევიჩიენე ღარიბაშვილის განცხადებებს.

  • ყოფილი კონგრესმენმა, ადამ კინზინგერმა დაწერა, რომ ქართული ოცნება პუტინიზმს უკვე აღარ მალავს.
  • "ივანიშვილისა და სხვების სანქცირების დროა. მათ ქვეყანა წარუმატებლობის გზაზე წაიყვანეს. ღარიბაშვილი ამის თქმით სხვისი გავლენის ქვეშ არის... და ეს არ არის ქართველი ხალხი".

  • "ვის წარმოადგენთ, ბატონო პრემიერო", — ვკითხულობთ საქართველოში აშშ-ის ყოფილი ელჩის Twitter-ზე.
  • ღარიბაშვილის გამოსვლა გააკრიტიკა გერმანიის პარლამენტის საგარეო საქმეთა კომიტეტის თავმჯდომარემ, მიხაილ როთმაც:
  • "საქართველოს ხელისუფლებას სასწრაფოდ სჭირდება, რომ გაარკვიოს ურთიერთობა ევროკავშირთან და NATO-სთან. რატომ ემსახურება პრემიერი ღარიბაშვილი პრორუსულ ნარატივებს?".
  • ბრიტანელმა პარლამენტარმა ღარიბაშვილის გამოსვლას კრემლის სამარცხვინო პროპაგანდა უწოდა და დაწერა, რომ თავდაცვა ესკალაცია არ არის.
  • "წარმოუდგენელია... საქართველოს პრემიერმინისტრი უკრაინაში რუსეთის შეჭრას ნატოს გაფართოებას აბრალებს. რა დაემართა საქართველოს?" — წერს აშშ-ის სამხედრო ძალების ყოფილი ხელმძღვანელი, ბენ ჰოჯესი.