რატომ არის მნიშვნელოვანი: 14 მაისს თურქეთში საპარლამენტო და საპრეზიდენტო არჩევნები ჩატარდა — საპრეზიდენტოში გამარჯვებული ვერ გამოვლინდა, ამიტომ მეორე ტური დაინიშნა.

  • ქვეყანა ისტორიული არჩევანის წინაშე დგას: ორი კანდიდატი განვითარების მკვეთრად განსხვავებულ გზებზე საუბრობს.
  • მოსალოდნელია, რომ არჩევნები განსაზღვრავს ქვეყნის როლს ნატოს ალიანსში, მის ურთიერთობას აშშ-თან, ევროკავშირთან და რუსეთთან, მიგრაციის პოლიტიკას, ანკარას როლს უკრაინის ომში და სხვა მნიშვნელოვან უსაფრთხოების ასპექტებს.

კანდიდატები: ოპოზიციური სპექტრის საერთო კანდიდატი ქემალ ქილიჩდაროღლუა, მეტსახელად "თურქი განდი".

  • ის მთავარ ოპოზიციურ რესპუბლიკურ სახალხო პარტიას (CHP) ხელმძღვანელობს და სურს თურქეთი ევროკავშირში გაწევრიანების პროცესს დაუბრუნოს, აშშ-თან სამხედრო კავშირები აღადგინოს.

  • მიუხედავად იმისა, რომ თურქეთი ნატოს თავდაცვითი ალიანსის ნაწილია, რეჯეფ თაიფ ერდოღანის დროს ქვეყანას მჭიდრო კავშირები აქვს ჩინეთთან და რუსეთთან.

  • ქილიჩდაროღლუ კი ირწმუნება, რომ მისი გამარჯვების შემთხვევაში თურქეთში საპარლამენტო მმართველობა იქნება, სადაც პარლამენტი და პრემიერმინისტრი უფლება-მოვალეობებს გაინაწილებენ.
  • 20-წლიანი მმართველობის შემდეგ, მოქმედ პრეზიდენტს მესამე ვადით დარჩენა სურს და თურქეთს ექვსი მილიონი სამუშაო ადგილის შექმნას და მრავალმხრივ განვითარებას ჰპირდება.

მეორე ტური: თურქეთის უმაღლესმა საარჩევნო საბჭომ განაცხადა, რომ წინასწარი შედეგებით, დათვლილია ხმების 75,4%.

  • ერდოღანმა — 53,4% დააგროვა, ხოლო ქილიჩდაროღლუმ კი — 46,6%.
  • ოპოზიციური საინფორმაციო სააგენტოს პარალელური დათვლითაც, ერდოღანი ხმების 51%-ით ლიდერობს.

  • სახელმწიფო საინფორმაციო სააგენტო ანადოლუს არაოფიციალური შედეგები აჩვენებს, რომ სტამბულში დაძაბული ბრძოლაა.

  • მათი ინფორმაციით, დათვლილია ხმების 99,97%-ით: ქილიჩდაროღლუ — 51,63%, ერდოღანი — 48,37%.

  • რაც შეეხება ზოგად შედეგებს, ანადოლუს ბოლო მონაცემებით, დათვლილია 98,52% და ერდოღანს 52,11% აქვს.

გამოხმაურებები: წინასწარ მონაცემებზე დაყრდნობით ერდოღანის მეგობარი ლიდერები უკვე აღნიშნავენ მის გამარჯვებას.

  • უნგრეთის პრემიერმინისტრმა, რომელიც ევროპაში ვლადიმერ პუტინის მოკავშირედ მიიჩნევა, ერდოღანს "არჩევნებში უდავო გამარჯვება" მიულოცა.
  • "ჩემო ძვირფასო ძმაო, რეჯეფ თაიფ ერდოღან, გილოცავთ გამარჯვებას", — დაწერა ყატარის ემირმა.
  • სტამბოლში, ერდოღანის პარტიის შტაბთან მოძრაობა სრულიად შეჩერებულია — მიუხედავად იმისა, რომ ხმების დათვლა ჯერ კიდევ არ არის დასრულებული, იქ უკვე საზეიმო ატმოსფეროა.

ფოტო: Reuters