ამის შესახებ ბრეგაძემ გამართულ ბრიფინგზე ისაუბრა.

რატომ არის მნიშვნელოვანი: ინფორმაცია, რომ სააკაშვილის საქმეს ადვოკატები სტრასბურგის სასამართლოში გზავნიდნენ 11 აპრილს გახდა ცნობილი.

• დაცვის მხარე დეტალების გასაჯაროებისგან თავს იკავებდა და არც იმას აკონკრეტებდა, თუ რას ეხებოდა სარჩელი.
• იუსტიციის მინისტრი ამბობს, რომ ადვოკატები სააკაშვილის ვარშავაში სამკურნალოდ გადაყვანას ითხოვნენ, რაც ადამიანის უფლებათა ევროპულმა სასამართლომ არ დააკმაყოფილა.
• მისივე თქმით, ექსპრეზიდენტს, ასევე, უარი ეთქვა სხვა სამკურნალო დაწესებულებაში გადაყვანაზე, რადგან "სახელმწიფოს ეს არ დაევალა".

დეტალები: ბრეგაძე ამბობს, რომ სააკაშვილის შემოსახლების პირველივე დღიდან დაიწყო "გაურკვეველი წყაროებიდან დაფინანსებული, მიზანმიმართული, ცილისმწამებლური კამპანია".

• მინისტრის მტკიცებით, ეს მიზნად ისახავდა საქართველოს ისეთ სახელმწიფოდ წარმოჩენას, სადაც ადამიანს აწამებენ.
• "ამ მიზნის მისაღწევად, ადამიანთა ეს ჯგუფი იმაზეც კი წავიდა, რომ მსჯავრდებული გაექეზებინათ, ჰქონოდა შიმშილობის 4 ეპიზოდი, არ დამორჩილებოდა ექიმთა რეკომენდაციებს, არ ემკურნალა და შესაბამისად, გაეუარესებინა ჯანმრთელობის მდგომარეობა, რაც სხვა არაფერია, თუ არა თვითდაზიანება", — თქვა ბრეგაძემ.
• ასევე, დაამატა, რომ სტრასბურგის გადაწყვეტილება სააკაშვილის მიმართ სახელმწიფოს კორექტულ და ადამიანის უფლებების უმაღლესი სტანდარტების ქმედებას აჩვენებს.

ადვოკატების განმარტებით, ეს სააკაშვილის საქმეზე ევროსასამართლოს საბოლოო გადაწყვეტილება არაა.

• "ეს გახლავთთ პროცედურული, ე.წ. დროებითი ღონისძიების სარჩელის განხილვამდე სააკაშვილის გადაყვანის საკითხთან დაკავშირებით მიღებული პროცედურული გადაწყვეტილება", — ამბობს შოთა თუთბერიძე.
• მისივე თქმით, დაცვის მხარემ პროცესის დაწყებისთანავე გამოიყენა ყველა ბერკეტი, რომლის საშუალებასაც ადამიანის უფლებათა ევროპული კონვენცია და სასამართლოს მუშაობის წესები იძლეოდა, ხოლო დროებითი ღონისძიება სწორედ ამგვარი ერთ-ერთი მექანიზმი იყო.
• "ამ პროცედურულ საკითხზე ევროსასამართლომ არ დაავალა საქართველოს მთავრობას სააკაშვილის დაუყოვნებლივი გადაყვანა ვარშავაში. როგორც მინიმუმ, სანამ საჩივრის განხილვა არ დასრულდება", — აცხადებს ადვოკატი.
• თუთბერიძის ინფორმაციით, საქმის არსებითი განხილვა გრძელდება.

სააკაშვილი გადაწყვეტილებას ფეისბუქგვერდზე გამოეხმაურა. მისი თქმით, სტრასბურგში იურიდიული პროცესი, ხოლო მისი ბრძოლა სიცოცხლისთვის, საქართველოსა და უკრაინისთვის გრძელდება.

• "მინდა, ყველა ჩემმა მომხრემ და საერთოდ საღი აზრის მქონე ყველა ადამიანმა გაიაზროს, რომ უკვე თითქმის ორი წელია მაწამებენ, აბსოლუტურად გამოგონილი ბრალდებებით, სრულიად უდანაშაულოს. ჩემი ერთადერთი დანაშაული არის ის, რომ რუსეთის ცხვირწინ შევქმენი ნამდვილი სახელმწიფო და მყარად შემოვატრიალე ის ევროკავშირისა და NATO-სკენ", — დაწერა მან.
• "ადამიანები თუ გრძნობენ პასუხისმგებლობას სიაში მოხვდრის და გამორჩენის გამო რომ კიოდნენ ტელევიზიებში - ჩამოდი მეგობარო! ფიქცია, ოპოზიციის ბუტაფორია ხალხი. ახლაც აგრძელებენ ურცხავად. დაასრულეთ ამ ადამიანით სპეკულაციები. გეყოთ სინდისი და პასუხისმგებლობა. ცოდოა", — ასე ეხმაურება დამოუკიდებელი დეპუტატი, ხატია დეკანოიძე სტრასბურგის გადაწყვეტილებას.