ლაზარე გრიგორიადისის საქმის სასამართლო პროცესი საქალაქო სასამართლოში დღეს, 8 მაისს უნდა გამართულიყო.

რატომ არის მნიშვნელოვანი: რუსული კანონის საწინააღმდეგო აქციის მონაწილე, 21 წლის ლაზარე გრიგორიადისი პოლიციამ 29 მარტს დააკავა, 31 მარტს კი სასამართლომ აღკვეთის ღონისძიების სახით პატიმრობა შეუფარდა.

  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავების შემდეგ მის წინააღმდეგ ქართულმა ოცნებამ მადესკრედიტირებელი და პროპაგანდისტული კამპანია წამოიწყო.
  • მმართველი გუნდის თავმჯდომარემ გრიგორიადისს "გზას აცდენილი კაცი" უწოდა და თქვა, რომ მას "ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.
  • ადვოკატმა სააპელაციო სასამართლოს 2 აპრილს მიმართა და პატიმრობის გირაოთი შეცვლა მოითხოვა, რაზეც უარი მიიღო.
  • პირველ მაისს გამართულ პროცესზე სასამართლომ გრიგორიადისი პატიმრობაში დატოვა.

ადვოკატის თქმით, ჰაბიდოსკოპიური ექსპერტიზის დანიშნვა სააპელაციოშია გასაჩივრებული, გადაწყვეტილება ჯერ არ არის მიღებული და სხდომა ამ მიზეზით გადაიდო.

  • "გადაგზავნილია საქმე სააპელაციო სასამართლოში, რომელიც ჯერ არ დაბრუნებულა და ლოგიკურია, შესაბამისად, არც არავის აქვს დაწერილი, ამიტომ პროცესი გადაიდება", — ამბობს ლიკა ბითაძე.
  • სასამართლოს დაწყებამდე საქალაქოს ეზოში აქტივისტის მხარდამჭერები იყვნენ შეკრებილები, ლაზარე გრიგორიადისის მამის თქმით, ადვოკატებს პროცესის გადადებაზე წინასწარ არ აცნობეს.
  • "ისიც კი არ უთხრეს ადვოკატებს, რომ თქვენი საჩივარი ჯერ კიდევ განხილვაშია და ნუ მოხვალთ, არ ინიშნება სასამართლო. ჩუმად არიან, არ ამბობენ ვინ არის მოსამართლე და ასე გვატარებენ. ხალხს აბრაზებენ", — განაცხადა მან.

გრიგორიადისის უფლებების დარღვევაზე მისმა უფლებადამცველმა არაერთხელ ისაუბრა.

  • ლიკა ბითაძის თქმით, ბრალდებულს აღიარებითი ჩვენება მეგობრის დაკავების მუქარითა და ადვოკატთან გასაუბრების გარეშე მიაცემინეს.
  • ასევე, ამბობს იმასაც, რომ 21 წლის აქტივისტს პენიტენციურ დაწესებულებაში თავი მისი ნების საწინააღმდეგოდ გადაპარსეს.