კერძო სამხედრო კომპანია ვაგნერის ჯგუფის დამფუძნებლის ვიდეო რუსულ სოციალურ ქსელში ვრცელდება.

რატომ არის მნიშვნელოვანი: ბოლო რამდენიმე თვის განმავლობაში პრიგოჟინი ღიად უპირისპირდებოდა რუსეთის თავდაცვის სამინისტროს, კერძოდ, ადანაშაულებდა სამხედრო ხელმძღვანელობას მისი დაქირავებულებისთვის ჭურვების გადაზიდვის მიზანმიმართულად ხელშეშლაში.

  • ერთ-ერთ ინტერვიუში მან თქვა, რომ იარაღის მიწოდებაზე ულტიმატუმის წერილი მისწერა თავდაცვის მინისტრს სერგეი შოიგუს და დრო 28 აპრილამდე მისცა.
  • მისივე განცხადებით, უკრაინის შეიარაღებული ძალების მოსალოდნელი შეტევის წინ, საბრძოლო მასალების ნაკლებობამ შეიძლება გამოიწვიოს კატასტროფული შედეგები რუსეთისთვის.
  • ჯერ კიდევ აპრილის ბოლოს პრიგოჟინი ამბობდა, რომ თუ საბრძოლო მასალის დეფიციტს არ შეავსებენ, იძულებულები გახდებიან, დატოვონ ბახმუტი.

დეტალები: ვრცელდება მიმართვის ორი ვიდეო, საიდანაც პირველში ჩანს ვაგნერის დაჯგუფების მკვდარი ჯარისკაცები, რომლებზეც ამბობს, რომ მათი სისხლი ჯერ კიდევ ახალია.

  • "ახლა მომისმინეთ, ბო*ებო, ესენი ვიღაცის მამები არიან და ვიღაცის შვილები, ბო*ებო. და ის ნაძირლები, რომლებიც არ გვაძლევენ საბრძოლო მასალას, ბო*ები, ჯოჯოხეთში მოხვდებიან, მათ შიგნეულობას შეჭამენ", — ამბობს პრიგოჟინი.
  • ამბობს, რომ საბრძოლველად ჯგუფის წევრები ნებაყოფლობით მივიდნენ და კვდებიან იმის გამო, რომ შოიგუ და სხვა მაღალი თანამდებობის პირები "წითელი ხით მოწყობილ კაბინეტებში გასივდნენ".
  • გამწარებული პრიგოჟინი ვიდეოში ამბობს, რომ საბრძოლო მასალის 70%-იანი დეფიციტი აქვთ.
  • "შოიგუ, გერასიმოვ, სად არის ბო*ო საბრძოლო იარაღი? შეხედეთ ამას, ბო*ებო", — ყვირის გამწარებული პრიგოჟინი ვიდეოში.

მეორე ვიდეოში ამტკიცებს, რომ ბახმუტში მხოლოდ 2 კილომეტრი დარჩა ასაღები და ამას იმიტომ ვერ ახერხებენ, რომ რუსეთის თავდაცვის სამინისტროს მათი შურს.

  • ჩანაწერი, რომელიც ცალსახად შეურაცხმყოფელია რუსეთის თავდაცვის სამინისტროს მიმართ, პრიგოჟინი ამბობს, რომ მისი ბიჭები ბახმუტში უაზრო დანაკარგის გაგრძელებას არ აპირებენ და 10 მაისს ბახმუტს დატოვებენ.
  • პრიგოჟინი თავდაცვის მინისტრს, პუტინსა და რუს ხალხს მიმართავს და ამბობს, რომ 16 მარტს, მას შემდეგ რაც ე.წ სამხედრო ოპერაცია გეგმის მიხედვით ვერ წავიდა, დახმარება მათ სთხოვეს.
  • ჰყვება, რომ რუსული არმია სირცხვილისგან რომ გადაერჩინათ, რადგან სამარცხვინოდ გაქცევა უწევდათ, ფრონტის ხაზი აიღეს.
  • პრიგოჟინი ამბობს იმასაც, რომ ბახმუტის "ხორცის საკეპში" წარმატების მიღწევის შემდეგ თავდაცვის სამინისტროს ბიუროკრატები ბოღმამ დაახრჩო და საპასუხოდ საბრძოლო მასალების "შიმშილი" მოუწყვეს.