ამის შესახებ ინფორმაციას სახალხო დამცველი ავრცელებს.

რატომ არის მნიშვნელოვანი: ყოფილი ნარკოლოგიური ცენტრის შენობაში განთავსებულ გორის სოციალურ საცხოვრისში, ომბუდსმენის ცნობით, 300-მდე ადამიანი, 80-მდე ოჯახი ცხოვრობს.

  • ლევან იოსელიანი ამბობს, რომ საცხოვრისს არ აქვს საკანალიზაციო და სადრენაჟო სისტემები; არ არის მოწყობილი სამზარეულო და ინდივიდუალური სველი წერტილები.
  • ასევე მაცხოვრებლებს ხელი არ მიუწვდებათ სუფთა წყალზე, რაც განსაკუთრებულ საფრთხეს უქმნის მობინადრეთა სიცოცხლესა და ჯანმრთელობას.

დეტალები: "შემიძლია ცალსახად ვთქვა, რომ უფრო რთული მდგომარეობა, ვიდრე დღეს გორის სოციალურ საცხოვრისში ვნახე, არსად არ შემხვედრია. შენობაში სველი წერტილებიც კი არ არის და ასეთ პირობებში უწევთ ცხოვრება ამ ოჯახებს, მათ შორის, ბავშვებს და შშმ პირებს", — ამბობს იოსელიანი.

  • განმარტავს, რომ ყველაფერს გააკეთებს იმისთვის, რათა მთავრობამ ადგილობრივმაც და ცენტრალურმაც გამონახოს სახსრები და ეს ადამიანები ნორმალურ პირობებში დაასახლოს.
  • "გორის სოციალურ საცხოვრისში განთავსებული მოქალაქეების მდგომარეობასთან დაკავშირებით, სახალხო დამცველი შიდა ქართლის გუბერნატორს მიხეილ შაყულაშვილს შეხვდა", — წერს სახალხო დამცველი.