პანემში ვბრუნდებით — ნახეთ შიმშილის თამაშების ახალი ფილმის ტრეილერი

ლეგენდარული დისტოპიური საგა, რომელმაც წლების წინ მოგვნუსხა და თავდავიწყებით შეგვაყვარა თავი, დიდ ეკრანებზე ბრუნდება — შიმშილის თამაშების ახალი ფილმის პრემიერამდე სულ რამდენიმე თვეღა რჩება!

სანამ შემოდგომის მიწურულს ფილმს ვიხილავდეთ, კინოკომპანია Lionsgate-მა უკვე გაავრცელა მისი პირველი ტრეილერი, რომელსაც ისტორიის ერთგული გულშემატკივრებისგან მთელ მსოფლიოში აღფრთოვანებული გამოხმაურება მოჰყვა. ფილმი, სახელწოდებით The Ballad of Songbirds & Snakes ("ბალადა მგალობელ ჩიტებსა და გველებზე") შიმშილის თამაშების დანარჩენი ფილმების ერთგვარი წინაისტორიაა, რადგან მასში მოქმედება ქეთნის ევერდინის ეპოქამდე ათწლეულებით ადრე ვითარდება ახალგაზრდა კორიოლანუს სნოუს (მომავალი პრეზიდენტი სნოუს) გარშემო.

"ყოველ თამაშს ჰყავს გამარჯვებული, ყოველ შეწირულს ამბავი აქვს, ხოლო ყოველ საგას დასაწყისი მოეპოვება", — ამ სიტყვებით იწყება ეპიკური ისტორიის ახალი ფურცელი. ამასთან, ტრეილერით შესაძლებლობა მოგვეცა, იმ მსახიობებისთვის მოგვეკრა თვალი, რომელთა გამოჩენასაც ფილმში ყველაზე მეტად ველოდით.

მაგალითად, დასაწყისშივე ვხედავთ ოსკაროსან ვაიოლა დევისს, რომელიც ფილმში მთავარ ბოროტმოქმედს, რიგით მე-10 შიმშილის თამაშების შემქმნელ დოქტორ ვოლიუმნია გალს განასახიერებს. ტრეილერში ასევე ვხედავთ Euphoria-ის ვარსკვლავ ჰანტერ შაფერს, რომელიც ფილმში კორიოლანუსის ბიძაშვილისა და მესაიდუმლის, ტიგრის სნოუს, როლს ასრულებს.

მათთან ერთად კი, კინოსურათში მონაწილეობენ და მთავარ როლებს ასრულებენ ტომ ბლითი და რეიჩელ ზეგლერი.

ბალადა მგალობელ ჩიტებსა და გველებზე პრეზიდენტი სნოუს ადრეული წლების შესახებ მოგვითხრობს — როგორ იქცა ამბიციური ახალგაზრდა პირსისხლიან ტირანად. მე-10 შიმშილის თამაშებში 18 წლის კორიოლანუსს მე-12 რაიონიდან შეწირული ლუსის მენტორად ირჩევენ. სწორედ მას შემდეგ ვითარდება ნაწარმოებში მოქმედება. ფილმი კვლავაც სიუზენ კოლინზის რომანს ეფუძნება.

შიმშილის თამაშების ტრილოგია, რომლის გამოცემაც კოლინზმა 2008 წელს დაიწყო, მსოფლიოში ერთ-ერთ ყველაზე პოპულარულ სერიად იქცა. ამ დრომდე საგა 51 ენაზეა თარგმნილი და გაყიდულია 100 მილიონზე მეტ ეგზემპლარად. წიგნების მიხედვით გადაღებულმა ოთხმა ფილმმა კი, ჯამში $3 მილიარდამდე გამოიმუშავა.

ბალადა მგალობელ ჩიტებსა და გველებზე მწერალმა 2020 წლის მაისში გამოსცა. კორონავირუსის პანდემიის გამო დაწესებული შეზღუდვებისა და დაკეტილი მაღაზიების მიუხედავად, წიგნი პირველივე კვირაში ნახევარ მილიონზე მეტ ეგზემპლარად გაიყიდა. Lionsgate-მა კი რომანის ეკრანიზაციის სურვილი ჯერ კიდევ მის გამოცემამდე გამოთქვა.

შიმშილის თამაშების ახალი ფილმის პრემიერა 17 ნოემბერს შედგება.