რატომ არის მნიშვნელოვანი: როგორც ალექსანდრე ვალიაური ჰყვება, სახლთან კრიმინალური პოლიციის თანამშრომლებმა გააჩერეს და პირადობის მოწმობის წარდგენა მოთხოვეს.

  • მისი თქმით, სამართალდამცველებს სახელი და გვარი, საცხოვრებელი ადგილი და ტელეფონის ნომერი უთხრა, თუმცა, მიუხედავად ამისა, პრინციპულად და აგრესიულად სთხოვდნენ, მისთვის ფოტო გადაეღოთ, რაზეც უარი განაცხადა.

დეტალები: ვალიაური ამბობს, რომ იძულებით ჩატენეს მანქანაში, წაართვეს მობილური და ჩაატარეს უკანონო ჩხრეკა.

  • "მომაყენეს ფიზიკური შეურაცხყოფა, მირტყამდნენ მუშტებს, მუჯლუგუნებს", — იხსენებს ის.
  • მისივე განცხადებით, მოახერხა და რამდენჯერმე გაამეორებინა პოლიციელს სახელი და გვარი, რომელმაც უთხრა, რომ თემურ ტაბატაძეა.

On.ge-ს სპეციალურ საგამოძიებო სამსახურში განუცხადეს, რომ საქმეზე გამოძიება 20 აპრილს 333-ე მუხლის მე-3 ნაწილის ბ ქვეპუნქტით დაიწყო.

  • ეს მუხლი სამსახურებრივი უფლებამოსილების შესაძლო ძალადობით გადამეტებას გულისხმობს.