სამხრეთკორეელი მუსიკოსი და ბოიბენდ ASTRO-ის წევრი Moonbin 25 წლის ასაკში გარდაიცვალა. ინფორმაციას ჯგუფის სააგენტო ავრცელებს.

პოლიციის ცნობებზე დაყრდნობით, ადგილობრივი მედია იტყობინება, რომ Moonbin სეულში, საკუთარ ბინაში იპოვეს. გარდაცვალების მიზეზი ჯერჯერობით უცნობია, სააგენტომ კი ყველას მოუწოდა, ოჯახის პატივსაცემად, "სპეკულაციური და საზიანო ცნობების გავრცელებისგან" თავი შეიკავონ. ამის მიუხედავად, მედიაში გავრცელებული ინფორმაციის მიხედვით, მომღერლის სიკვდილის მიზეზი, შესაძლოა, სუიციდი ყოფილიყო.

Moonbin, რომლის ნამდვილი სახელი მუნ ბინია, ბენდ ASTRO-ისა და მისი ქვეჯგუფის, Moonbin & Sanha-ის, ცნობილი სახე გახლდათ. სანამ 2016 წელს პოპულარული K-pop ჯგუფის წევრი გახდებოდა, იგი მსახიობი და მოდელი იყო.

ბოლო წლების განმავლობაში კორეული პოპის არაერთი ცნობილი სახე გარდაიცვალა ახალგაზრდა ასაკში, სიკვდილის მიზეზი კი რიგ შემთხვევებში სწორედ სუიციდი იყო.

მომავალ K-pop ვარსკვლავებს სააგენტოები უმეტესად მოზარდობის ასაკში უკავშირდებიან, მოგვიანებით კი შემსრულებლები მკაცრად გაწერილი რეჟიმით ცხოვრობენ.

აღსანიშნავია ისიც, რომ სამხრეთ კორეა მსოფლიოში სუიციდის შემთხვევების ერთ-ერთი უდიდესი მაჩვენებლით გამოირჩევა.