საქართველოს სახალხო დამცველი ეხმიანება საქართველოს შოთა რუსთაველის თეატრისა და კინოს სახელმწიფო უნივერსიტეტის საკონკურსო მოთხოვნას, რომლის მიხედვით, პირველ შესარჩევ ტურზე მოწმდება, "აქვს თუ არა აბიტურიენტს გამოუსწორებელი ორგანული დეფექტი." ომბუდსმენი მიიჩნევს, რომ აღნიშნული ჩანაწერი შეუთავსებელია პროფესიულ მოთხოვნებთან და არის დისკრიმინაციული.

სახალხო დამცველი მიიჩნევს, რომ საქართველოს თეატრალური უნივერსიტეტის საკონკურსო მოთხოვნებში ზემოაღნიშნული ჩანაწერის ფორმულირება დამამცირებელი და შეურაცხმყოფელია შეზღუდული შესაძლებლობის მქონე და ასევე, იმ აბიტურიენტებისთვის, რომლებსაც ჯანმრთელობასთან დაკავშირებული პრობლემები აქვთ. მსგავსი ჩანაწერი არ არის გამართლებული რაიმე ლეგიტიმური მიზნით და აღნიშნულ ჯგუფებს გაუმართლებლად უზღუდავს მსახიობის პროფესიის დაუფლების შესაძლებლობას:

"განათლების უფლება, რაც, მათ შორის, მოიცავს უმაღლეს განათლებას, აუცილებელია, ხელმისაწვდომი იყოს ნებისმიერი ადამიანისთვის დისკრიმინაციის გარეშე, რამდენადაც ამ უფლებით შეუფერხებლად სარგებლობა დაკავშირებულია ინდივიდის დამოუკიდებელ არჩევანთან და პიროვნულ განვითარებასთან."

ომბუდსმენი მოუწოდებს საქართველოს შოთა რუსთაველის თეატრისა და კინოს სახელმწიფო უნივერსიტეტს, რომ ამოიღოს დრამის ფაკულტეტზე მისაღები საკონკურსო მოთხოვნებიდან დისკრიმინაციული ჩანაწერი და დაიცვას თანასწორობის პრინციპი ნებისმიერი აბიტურიენტის მიმართ.

აღნიშნულ საკითხს ომბუდსმენი მას შემდეგ გამოეხმაურა, რაც ამის შესახებ On.ge-მ სტატიის მომზადება გადაწყვიტა.

პროექტის, "ქალები საქართველოდან", ფარგლებში, 26 წლის ნუცა გოგალაძემ დაწერა, რომ მას ბავშვობაში, თამაშის დროს თვალში "შპრიცი" შეერჭო, შედეგად კი 9 წლის ასაკში მთლიანად დაკარგა მხედველობა ცალ თვალში და პროთეზირება გახდა საჭირო .

ნუცა ჰყვება, რომ მან არაერთხელ სცადა თეატრალურ უნივერსიტეტში მოხვედრა, თუმცა ვერცერთ წელს ვერ ჩააბარა:

"გარკვეული პერიოდის მერე ვიგებ, რომ ბავშვებისგან და მათი მშობლებისგან შვიდი ოფიციალური საჩივარი იყო შესული. მთავარი პრეტენზია რეჟისორთან ჰქონდათ, რადგან მე მქონდა "გამოუსწორებელი" ნაკლი (მათი აზრით), მათგან განსხვავებით და უსამართლობა იქნებოდა, მე გავმხდარიყავი სტუდენტი, ისინი კი - ვერა".

თეატრალურ უნივერსიტეტში On.ge-ის განუმარტეს, რომ "გამოუსწორებელი ორგანული დეფექტები" პროფესიასთან და პროგრამულ დატვირთვასთანაა შეუთავსებელი:

"მაგალითად, როდესაც წარმოთქმაა შეუთავსებელი, დარღვეული აქვს პირის აპარატი და აღენიშნება პროგენია ან პროგრანია (ზედა და ქვედა ყბის გამოვარდნა) და მეტყველებაში უშლის ხელს. როდესაც სწორად წარმოთქმა უჭირს სიტყვების, აქვს ძვალსახსროვანი სისტემის დეფექტი და საშიშია სალტოს გაკეთება ისევე, როგორც ამ დროს სპორტსმენებში არ შეიძლება დატვირთვა".