რა მოხდა: 17 მარტს დიდ დიღომში, იოანე პეტრიწის ქუჩასთან მდებარე ნაგავსაყრელად ქცეულ ტერიტორიაზე, 12 წლის მოზარდი გარდაცვლილი იპოვეს.

  • ოჯახის წევრები და ახლობლები არასრულწლოვანს 16 მარტის საღამოდან ეძებდნენ.
  • მომხდარზე გამოძიება სსკ-ის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს.

დეტალები: ოჯახის უფლებადამცველი ორგანიზაციის ცნობით, დანაშაულის ადგილზე მისულ დედასა და ადვოკატებს დანაშაულის ადგილი სრულიად სახეცვლილი დახვდათ.

  • "არსებული ინფორმაციით, საგამოძიებო უწყებისგან თანხმობის მიღების შემდეგ დანაშაულის ადგილზე თბილისის მერიის ადგილობრივმა გამგეობამ კეთილმოწყობის სამუშაოები დაიწყო, რამაც საქმისთვის საკვანძო მნიშვნელობის მტკიცებულებების განადგურება გამოიწვია", — ნათქვამია განცხადებაში.
  • მშობლების განმარტებით, არსებობს არაერთი გარემოება, რომლებიც მიუთითებს, რომ მოზარდის გარდაცვალების მიზეზი უბედური შემთხვევა ვერ იქნებოდა.
  • "კერძოდ, გარდაცვლილის ტელეფონი ნაპოვნია გვამისგან მოშორებით. წარმოდგენილი ფოტოსურათებით იკვეთება, რომ გოგონას აღენიშნებოდა სახის, შუბლის, ყურისა და ზურგის არეში ნაკაწრები და დაზიანებები. დაზიანებული იყო, ასევე, ბავშვის ტანსაცმელი. გარდა ამისა, გოგონას გვამის განლაგება ბადებს ეჭვს, რომ, შესაძლოა, ადგილი ჰქონოდა გვამის გადამალვის მცდელობას".
  • ორგანიზაცია ყურადღებას ამახვილებს იმაზეც, რომ დღემდე საგამოძიებო უწყებას გარდაცვლილი არასრულწლოვანის დედა დაზარალებულის უფლებამონაცვლედ არ უცნია.