ცოტა ხნის წინ ბარბის ტრეილერი გამოქვეყნდა, რომელშიც გრეტა გერვიგის ახალი ფილმიდან რამდენიმე სცენას ვხედავთ. ფილმში ბარბის როლს მარგო რობი ასრულებს, ხოლო რაიან გოსლინგი თოჯინა კენს განასახიერებს.

ფილმის ახალი ტრეილერი სიუჟეტის შესახებ უფრო მეტ დეტალს გვიმხელს. ბარბის წინა ტრეილერი სტენლი კუბრიკის ლეგენდარული ფილმის, 2001: კოსმოსური ოდისეის დასაწყისს საოცარი სიზუსტით იმეორებდა. ტრეილერში ბავშვის თოჯინებით მოთამაშე გოგოები უზარმაზარ მარგო რობის ხედავდნენ და მისით აღფრთოვანებული საკუთარ თოჯინებს ლეწავდნენ.

ახალ ტრეილერში კი ბარბის იდეალურ სამყაროს ვეცნობით და მარგო რობისთან ერთად სხვა პერსონაჟებსაც ვხედავთ. გარდა ამისა, ახალი ტრეილერიდან ცნობილი გახდა, რომ ბარბი და კენი იდეალური სამყაროდან რეალობაში ბრუნდებიან. ამასთანავე, ტრეილერიდან აშკარაა, რომ წინ საოცარი და ფერადი თავგადასავალი გველის, რომელიც კინომოყვარულებს იმედს ნამდვილად არ გაუცრუებს.

ბარბის პრემიერა 21 ივლისსაა დაგეგმილი.