რატომ არის მნიშვნელოვანი: ლევან იოსელიანმა ადამიანის უფლებათა და თავისუფლებათა დაცვის მდგომარეობაზე 2022 წლის ანგარიში წარადგინა.

  • დოკუმენტში საუბარია ადამიანის უფლებების დაცვის მიმართულებით არსებულ გამოწვევებსა და გაცემული რეკომენდაციების შესრულების მდგომარეობაზე.
  • ეს არის ბოლო წლიური ანგარიში, რომელზეც ყოფილა სახალხო დამცველმა, ნინო ლომჯარიამ და მისმა მოადგილეებმა, გიორგი ბურჯანაძემ და ეკატერინე მსხილაძემ, იმუშავეს — მათ პოსტი რამდენიმე დღის წინ დატოვეს.
  • ბურჯანაძემ დაწერა, რომ აპარატიდან წასვლის მიზეზებზე არ ისაუბრებს, თუმცა მისივე თქმით, ასეთი ფაქტორი უამრავია.

დეტალები: ომბუდსმენის თანახმად, 2022 წელს ადამიანის უფლებების დაცვის მდგომარეობა არსებითად არ გაუმჯობესებულა და რიგი მიმართულებებით მნიშვნელოვანი გაუარესებაც კი შეინიშნებოდა.

  • უარყოფით მოვლენებს შორის სახალხო დამცველი განიხილავს სახელმწიფო ინსპექტორის სამსახურის გაუქმებას და მის ნაცვლად ორი დამოუკიდებელი ინსტიტუტის, სპეციალური საგამოძიებო და პერსონალურ მონაცემთა დაცვის სამსახურების, შექმნას.
  • ანგარიშში, ასევე, ვკითხულობთ, რომ პარლამენტმა არ გაიზიარა ევროკავშირის მიერ კანდიდატის სტატუსის მისაღებად სასამართლო ხელისუფლების რეფორმირებისთვის შემუშავებული წინაპირობები.
  • "არც იუსტიციის უმაღლესი საბჭოს რეფორმა მიმდინარეობს და არც სასამართლო კანონმდებლობის დახვეწისა და ხარვეზების აღმოფხვრის პროცესი".
  • ნეგატიურ მოვლენებს შორის ომბუდსმენი ასახელებს რუსული კანონის პროექტის მომზადებასა და ინიციირებასაც.