16 ივნისს, Lisi Wonderland-ის საფესტივალო ტერიტორიაზე Tbilisi Open Air გაიხსნა. ერთწლიანი ლოდინის შემდეგ ქართველი და უცხოელი მსმენელები ლისზე შეიკრიბნენ და მოწვეულ მუსიკოსებს ხმაურით შეეგებნენ.

ფესტივალი ოფიციალურად 19:00 სთ.-ზე გაიხსნა და ის ქართულმა ჯგუფმა, დაგდაგანმა გახსნა, რომელმაც თავისი ყველაზე ცნობილი სიმღერები შეასრულა და შეკრებილ აუდიტორიას საუკეთესო საფესტივალო განწყობა შეუქმნა.

20:00 სთ.-ზე Golden Stage-ის სცენა NINO KATAMADZE & INSIGHT-მა დაიკავა. ნინო ქათამაძის გამოსვლა, როგორც ყოველთვის, ენერგიული, ორიგინალური და მომხიბვლელი იყო. ქართველმა მომღერალმა დაგდაგანის მიერ დანთებული ცეცხლი კიდევ უფრო გაამძაფრა და მსმენელების განწყობა ერთი-ორად აამაღლა.

ამ დროს კი, Main Stage-ზე ცნობილი ქართული ჯგუფი Loudspeakers უკრავდა მსმენელებისთვის. აღნიშნული ჯგუფი ერთ-ერთი გამორჩეულია ქართულ შოუ-ბიზნესში, რომელსაც დიდი რაოდენობით გულშემატკივრები ჰყავს. Loudspeakers-მა თავიანთი ყველაზე ცნობილი სიმღერები შეასრულეს და საღამო კიდევ უფრო გაალამაზეს.

ფოტო: დიმიტრი სანაია

მოგვიანებით, Main Stage-ზე ირანული წარმოშობის ჰოლანდიელი მუსიკოსი, Sevdaliza გამოჩნდა, რომელმაც ბევრისგან მოულოდნელად საოცარი სანახაობა შემოგვთავაზა. ეშხიანი და სექსუალური მომღერალი სცენაზე ექსტრავაგანტული კაბით გამოვიდა და სცენასთან შეკრებილი აუდიტორია მაშინვე მონუსხა.

ფოტო: დიმიტრი სანაია

Sevdaliza სცენაზე მარველის კომიქსების გმირ შავ კატას მოგაგონებდათ, რომელიც თავისი ორიგინალური ცეკვითა და ეგზოტიკური იერით, ნამდვილი ძლიერი ქალის შთაბეჭდილებას ტოვებდა.

ფოტო: დიმიტრი სანაი

ფოტო: დიმიტრი სანაია

ფოტო: დიმიტრი სანაია

Sevdaliza-მ თავისი გამოსვლის ბოლოს შეკრებილ აუდიტორიას გულთბილი დახვედრისთვის მადლობა გადაუხადა, განსაკუთრებით კი ირანელი ვიზიტორები გამოყო. როგორც უკვე გითხარით, ის წარმოშობით ირანელია და მისთვის, როგორც ჩანს, ირანელების ჩამოსვლა მის კონცერტზე, დიდი სიურპრიზი აღმოჩნდა. არტისტმა მსმენელებს სამახსოვრო ვიდეო გადაუღო და პირობა დადო, რომ საქართველოში კიდევ არაერთხელ ჩამოვიდოდა.

ფოტო: დიმიტრი სანაია

Sevdaliza-ს შემდეგ მთავარი სცენა პირველი საფესტივალო დღის ჰედლაინერმა, Anathema-მ დაიკავა. ბრიტანული ჯგუფის გამოჩენას მსმენელების მხრიდან განსაკუთრებული ოვაციები მოყვა.

ფოტო: დიმიტრი სანაია

ბრიტანულმა ჯგუფმა ფესტივალის დასკვნით ნაწილში განსაკუთრებული მუხტი შემოიტანა. ვინსენტ კავანას მომაჯადოებელმა ხმამ და სიმღერებმა უამინდობა გადაფარა.

Anathema-მ თავის ყველაზე ცნობილ სიმღერებთან ერთად, რამდენიმე ჰიტი ახალი ალბომიდანაც შეასრულა. კონცერტის მიმდინარეობისას, მომღერალმა არაერთხელ აღნიშნა, რომ თბილისში ჩამოსვლით ძალიან ბედნიერია და არ ელოდა ასეთ გარემოს. ის სასიამოვნოდ გაოცებული იყო.

ფოტო: დიმიტრი სანაია

ფოტო: დიმიტრი სანაია

ფოტო: დიმიტრი სანაია

ფოტო: დიმიტრი სანაია

ფოტო: დიმიტრი სანაია

ფოტო: დიმიტრი სანაია

შეგახსენებთ, რომ Tbilisi Open Air-მა სტარტი 16 ივნისს აიღო და ის კიდევ ორი დღის განმავლობაში, 18 ივნისის ჩათვლით გაგრძელდება. პირველი დღის ჰედლაინერი ცნობილი ბრიტანული ჯგუფი Anathema იყო, 17-ში კი მთავარ სცენას Leningrad დაიკავებს, ხოლო ფესტივალს გრანდიოზულად დახურავს მსოფლიოში ცნობილი ჯგუფი Archive, რომელიც საქართველოში მეორედ ჩამოვა.