საქართველოს პარლამენტმა საქართველოს მოქალაქეობის არმქონე პირებისთვის სასოფლო-სამეურნეო მიწის გასხვისებაზე მორატორიუმის დაწესებას, პირველი მოსმენით, მხარი დაუჭირა. დღეს, 15 ივნისს კენჭისყრაზე შეზღუდვის მომხრე 95 დეპუტატი იყო, მოწინააღმდეგე კი - 7.

ამ კანონის მიღების შემთხვევაში, საქართველოს კონსტიტუციაში სასოფლო-სამეურნეო დანიშნულები მიწის საკითხებზე ცვლილებების დაწესებამდე საქართველოს მოქალაქეობის არ მქონე პირებისთვის შეზღუდვა წესდება.

საქართველოს მოქმედი კანონმდებლობით, უცხო ქვეყნის მოქალაქეებს საქართველოში სასოფლო-სამეურნეო მიწის ყიდვაზე შეზღუდვები არ აქვთ. თუმცა, კონსტიტუციის პროექტით, საქართველოს კონსტიტუციაში მიწასთან დაკავშირებით ჩანაწერი ჩნდება, რომლითაც "მიწა არის უნიკალური რესურსი", რომლის გასხვისების წესების განსაზღვრაც კანონმდებლობაში იგეგმება.

30 მაისს საქართველოში უცხოელებზე მიწის მიყიდვის აკრძალვის კანონპროექტი საპარლამენტო უმრავლესობის, ქართული ოცნების წევრებმა შეიტანეს. კანონპროექტით, იკრძალება საქართველოს მოქალაქეობის არ მქონე პირებისთვის სასოფლო-სამეურნეო დანიშნულების მიწის მიყიდვა. კანონპროექტის მიღებამდე მიწის გასხვისებაზე მორატორიუმი გამოცხადდა.