ხუთი არასამთავრობო ორგანიზაცია ეხმიანება საზოგადოებრივ მაუწყებელზე წითელი ზონისა და ინტერVIEW-ს შეჩერებას. ორგანიზაციების განცხადებით, რადიო თავისუფლების გადაცემების დახურვა საზოგადოებრივი მაუწყებლის ეთერიდან ხელისუფლების მწვავე კრიტიკის გაქრობის ინტერესს შეიძლება უკავშირდებოდეს და მაუწყებლის ხელმძღვანელობის პოლიტიკურ დაინტერესებულობასთან დაკავშირებით ეჭვს აჩენს:

"წითელი ზონისა და ინტერVIEW-ს უაპელაციო დახურვის შესახებ მენეჯმენტის უკვე მიღებული გადაწყვეტილება მის პოლიტიკურ ინტერესებს ნათლად აჩვენებს და მომავალში დაგეგმილი გადაცემების შერჩევის პროცესის პოლიტიზირების შესახებ შიშებს წარმოშობს. მიღებული თვითნებური და დაუსაბუთებელი გადაწყვეტილება არსებითად არყევს მაუწყებლის მიმართ საზოგადოებრივ ნდობას და მისი სატელევიზიო ბადიდან კრიტიკული გადაცემების გაქრობის შესაძლო ტენდენციაზე მიუთითებს."

ადამიანის უფლებების სწავლებისა და მონიტორინგის ცენტრი (EMC); საქართველოს ახალგაზრდა იურისტთა ასოციაცია (GYLA); ფონდი ღია საზოგადოება - საქართველო (OSGF); კოალიცია მედია ადვოკატირებისთვის და სამართლიანი არჩევნებისა და დემოკრატიის საერთაშორისო საზოგადოება (ISFED) მოითხოვენ, რომ:

  • შენარჩუნდეს საზოგადოებრივი მაუწყებლის ეთერში გადაცემები წითელი ზონა და ინტერVIEW;
  • მაუწყებლის მენეჯმენტმა წარმოადგინოს კონკრეტული დასაბუთება და დეტალური არგუმენტაცია, თუ რა გახდა განსახილველი გადაცემების დახურვის შესახებ გადაწყვეტილების მიღების საფუძველი;
  • საზოგადოებრივი მაუწყებლის რეფორმირების და სატელევიზიო ბადის შერჩევის შემდგომი პროცესი წარმართოს იმდაგვარად, რომ მაქსიმალურად დაიცვას საზოგადოებრივი მაუწყებლის იდეა, მისი პოლიტიკური ნეიტრალიტეტის, დამოუკიდებლობის, გამჭვირვალობისა და პლურალიზმის პრინციპები და სამეურვეო საბჭოს მიერ განსაზღვრული პრიორიტეტები.

ამავე თემაზე:

13 ივნისს ცნობილი გახდა, რომ საზოგადოებრივ მაუწყებელზე სალომე ასათიანის ინტერVIEW და გოგი გვახარიას წითელი ზონა ივლისის შუა რიცხვებიდან აღარ გავა. მაუწყებლის სტრატეგიული სამსახურის უფროსი, ია ანთაძე ამბობს, რომ მომავალი სეზონიდან მაუწყებლის ეთერში მხოლოდ კონკურსის წესით შერჩეული ან საკუთარი რესურსით დამზადებული გადაცემები მოხვდება. საზოგადოებრივი მაუწყებლის მიმდინარე და ახალი ამბების ბლოკის დირექტორმა, გიორგი გვიმრაძემ კი On.ge-ს უთხრა, რომ რადიო თავისუფლებამ მაუწყებლისგან ხელშეკრულებების ვადის ამოწურვის შესახებ მიიღო წერილი, თუმცა გაგრძელდება თუ არა გადაცემები, გვიმრაძეს კონკრეტული პასუხი არ აქვს.