მულტივერსში გამავალი პორტალი როგორც ჩანს თბილისში გაიხსნა.

მისი დატესტვა კი პირველად 17 წლის დავითას მოუწია, რომელსაც სამყაროებს შორის მოგზაურობა, ბოროტებასთან ბრძოლა და დიდი ხნის წინ დაკარგული მამის პოვნა დაეკისრა გმირულ ვალად.

სამართლიანი იქნება თუ ვიტყვით, რომ 10 მარტიდან ქართველ მაყურებელს პირველად ძალიან მაღალი ხარისხის ქართული ახალგაზრდული 2D ანიმაციის — სხვა ლეველის ოდისეის — ხილვის შესაძლებლობა აქვს.

როგორც უკვე ვთქვით, ამბავი 17 წლის დავითას გარშემო ვითარდება — მაყურებელი მასთან ერთად იხილავს ურიცხვ ჯადოსნურ სამყაროს ძალიან უცნაური ფორმებით, ძალიან უცნაური ბინადრებითა და ძალიან უცნაური ფიზიკის კანონებით — სამყაროებს, სადაც საპნის ბუშტს შეიძლება ნემსი უყვარდეს, ხოლო ბუშტები თავისუფლებისთვის იბრძოდნენ.

ამ უცნაურ ამბავთა ციკლი კი იმით დაიწყო, რომ ერთ დღესაც, თბილისი მიწისძვრამ შეაზანზარა, დავითამ კი დაკარგული მამის წერილს სრულიად შემთხვევით მიაგნო.

მას შემდეგ რა მოხდა, მაინც, როგორ გაიხსნა პორტალი და ზუსტად რამდენად ფერად სამყაროებში მოგზაურობა მოუწია დავითას — ამის ხილვა უკვე Cavea+-ზე სრულიად უფასოდ შეგიძლიათ. ერთი, რაც მოგიწევთ, უბრალოდ შესვლა, ჩართვა და წინ პოპკორნის დიდი ჯამის მოდგმაა.

სხვა ლეველის ოდისეა 4 სეზონისა და 40 სერიისგან შედგება და საქართველოში ამერიკის საელჩოს მხარდაჭერით Demlab, იგივე დემოკრატიის ლაბორატორია ამზადებს.

თიზერითა და პირველი ორი სერიით თუ ვიმსჯელებთ, წინ კიდევ უფრო ბევრი ისეთი მომენტი გველოდება, დასქრინვას რომ მოგვანდომებს და იქნებ, დავითასეული თავგადასავლები ჩვენი ტელეფონებისა და დესკტოპების ფონზეც აღმოჩნდეს.

როგორც Demlab-ში ამბობენ, იმისდა მიუხედავად, რომ ანიმაციის შესაქმნელად იმაზე უფრო მცირე დრო და რესურსი ჰქონდათ, ვიდრე ეს ზოგადად მსგავსი ხარისხის ანიმაციის შექმნას სჭირდება, გუნდის პროფესიონალიზმმა, კრეატიულობამ და მათი ანიმაციისადმი ძალიან დიდმა სიყვარულმა სხვა ყველაფერი გადაწონა.

მაშინ, როცა გამოძრავებს იდეა, რომელიც ძალიან მოგწონს, სამუშაო პროცესი, რამდენადაც რთული არ უნდა იყოს ის, ცალკე სიამოვნების წყარო ხდება, ხოლო შედეგი — ჩადებული ენერგიის რეპრეზენტაცია.

სხვა ლეველის ოდისეაც სწორედ შემოქმედების მიმართ მსგავსი დამოკიდებულების შედეგია მთელი თავისი ატრიბუტებით — შინაარსით, მხატვრობით, სამყაროებით.

მიუხედავად იმისა, რომ დავითა სამყაროში გაბნეულ ბოროტებას ფეხდაფეხ მულტივერსებში დასდევს, აღმოჩნდება, რომ იქაური ბოროტებაც ძალიან ჰგავს ჩვენთვის ნაცნობს; ტყუილების გავრცელება, ქაოსის დათესვა, ხალხისთვის შიშის ჩანერგვა, ათასგვარი ტყუილით მათი დაყოფა დღევანდელი რეალობისთვისაც საკმაოდ ნაცნობი თემებია არა მხოლოდ აქ, არამედ, გლობალურად.

როგორც ჩანს, ვიზუალურ სიამოვნებასთან ერთად შინაარსიც გვანებივრებს, განსაკუთრებით მათ, ვისაც სამყაროებში მოგზაურობა ბავშვობის ოცნებად ჰქონდა ახლაც დროდადრო ისეთ სერიალებს დაეძებს, სადაც დროსა და სივრცეში გაჩენილი "გლიჩიდან" უეცრად სულ სხვა სამყაროში ხვდები.

მოკლედ, რომ არ დაგასპოილეროთ რა ამბები ტრიალებს დავითას თავს, შეიარე Cavea+-ზე — იქ, სრულიად უფასოდ სხვა ლეველის ოდისეა გელით.

დააწკაპე აქ და ჩაუჯექი სხვა ლეველის ოდისეის პირველ ორ სერიას.