გუგლი თავის მომხმარებლებს 8 მარტს, ტრადიციულად, ახალი დუდლით ულოცავს. ქალთა საერთაშორისო დღის აღსანიშნად გუგლმა წელს ფოტო შემოგვთავაზა, რომელზეც სხვადასხვა პროფესიისა და სფეროს წარმომადგენელ ქალებს ვხედავთ, რომლებიც სხვა ქალებს ეხმარებიან.

"დღევანდელი დუდლით პატივისცემას გამოვხატავთ ქალთა საერთაშორისო დღის მიმართ იმ მრავალმხრივი მხარდაჭერის აღნიშვნით, რომელსაც ქალები ერთმანეთის მიმართ იჩენენ. გუგლის თითოეული ასო ხაზს უსვამს რამდენიმე სფეროს, რომლებშიც ქალები მთელს მსოფლიოში ერთმანეთს მხარს უჭერენ, რათა ერთმანეთის წინსვლასა და ცხოვრების ხარისხის გაუმჯობესებას ხელი შეუწყონ", — ვკითხულობთ გუგლის განცხადებაში.

გუგლის წლევანდელ დუდლზე ვხედავთ დედებს, პოლიტიკოს, მეცნიერ, ექიმ და აქტივისტ ქალებს, რომლებიც ერთმანეთს მხარს უჭერენ და ეხმარებიან. როგორც გუგლმა აღნიშნა, წლევანდელი ქალთა საერთაშორისო დღის აღსანიშნი გუგლის მთავარი თემა ქალების მხრიდან ერთმანეთის მხარდაჭერაა.

სხვადასხვა მნიშვნელოვანი თარიღის აღსანიშნად გუგლი დუდლებსა და ანიმაციებს ხშირად გვთავაზობს. გასული წლის ქალთა საერთაშორისო დღის აღსანიშნავად საძიებო სისტემის მთავარ გვერდზე ანიმაცია იყო გამოსახული, რომელზეც განსხვავებული სოციალური სტატუსისა და წარმომავლობის მქონე ქალები გამოჩნდნენ. გუგლს ამით სხვადასხვა კულტურაში მცხოვრები ქალების ყოველდღიურობისთვის ჩვენება სურდა, რომელიც პანდემიურმა რეალობამ მნიშვნელოვნად შეცვალა.