განცხადებას პროკურატურა ავრცელებს.

რატომ არის მნიშვნელოვანი: 13 ოქტომბერს ვაკის პარკის შადრევანში ჩასულ ბავშვებს დენმა დაარტყა. 13 წლის მოზარდი გარდაიცვალა, ხოლო 2 ბავშვი დაშავდა.

• შადრევანი მერიამ წინა დღეს, 12 ოქტომბერს ოფიციალურად გახსნა — სარეაბილიტაციო სამუშაოებს კომპანია გრინსერვისი+ ასრულებდა.

ბრალი წარედგინათ მერიის გარემოს დაცვის საქალაქო სამსახურის ყოფილ უფროსს, სამსახურებრივი გულგრილობის ჩადენის საქმეზე;

• ექსპერტიზა, მშენებლობა, დიზაინის სპეციალისტს, ყალბი ოფიციალური დოკუმენტის დამზადების და გამოყენების საქმეზე;
• და კიდევ სამ იურიდიულ პირს — გრინსერვის+-ს, "ექსპერტიზა, მშენებლობა, დიზაინს" და მშენექსპერტს.
• პროკურატურაში აცხადებენ, რომ საინჟინრო-ტექნიკური ექსპერტიზის დასკვნების მიღებამ საქმეში უკვე არსებულ სხვა მტკიცებულებებთან ერთად დაადასტურა უკვე დაკავებული ცხრა პირის ბრალეულობაც.
• 30 ნოემბერს, ვაკის პარკში მომხდარი ტრაგედიის საქმეზე დაკავებული ცხრავე ბრალდებული თბილისის საქალაქო სასამართლომ პატიმრობაში დატოვა — ისინი ბრალს არ აღიარებენ.

დეტალები: გამოძიების ვერსიით, გაყალბებული პროექტი, რომელიც გრინსერვის+-ის დირექტორმა მერიის საქალაქო სამსახურში წარადგინა იყო უხარისხო, ვინაიდან მასში არ იყო დაცული ელექტროდანადგართა მოწყობის უსაფრთხოების წესები.

• პროკურატურის განცხადებით, ექსპერტიზებით დადასტურდა, რომ გრინსერვის+-მა ცენტრალურ შადრევანზე სამუშაოები უხარისხოდ შეასრულა, რაც არ შეესაბამებოდა ადამიანის სიცოცხლის და ჯანმრთელობის უსაფრთხოების მოთხოვნებს.
• 2021 წლის 22 ოქტომბერს, ქალაქ თბილისის მუნიციპალიტეტის მერიის გარემოს დაცვის საქალაქო სამსახურსა და შპს გრინსერვისი+-ს შორის თბილისში, ვაკის პარკის ტერიტორიაზე არსებული შადრევნებისა და კასკადის სარეაბილიტაციო სამუშაოების თაობაზე სახელმწიფო შესყიდვების შესახებ ხელშეკრულება გაფორმდა.
• "ხელშეკრულების თანახმად, მიმწოდებელი ვალდებული იყო, მიღება-ჩაბარების აქტის გაფორმებამდე წარედგინა ექსპერტიზის ეროვნული ბიუროს ან აკრედიტირებული პირის მიერ გაცემული დასკვნა, ფაქტობრივად მოწყობილი ელ.ქსელის საშემსრულებლო ნახაზი, დამიწების კონტურების გაზომვის და უსაფრთხოების დამადასტურებელი დოკუმენტაცია".

გარდა ამისა, პროკურატურის თქმით, სამუშაოების მიმდინარეობისას, მერიის გარემოს დაცვის საქალაქო სამსახურში გრინსერვის+-მა გაყალბებული პროექტის ცვლილებები წარადგინა, სადაც არ იყო დაცული ელექტროდანადგართა მოწყობის უსაფრთხოების წესები.

• უწყებაში ამბობენ, რომ ცვლილებებს თან არ ახლდა სავალდებულო ექსპერტიზის დასკვნა, რომლითაც დადასტურდებოდა მათი შესაბამისობა ხელშეკრულების პირობებთან, მოქმედ სამშენებლო ნორმებთან და წესებთან.
• მათივე განცხადებით, 2022 წლის 16 მარტს და 15 აგვისტოს, მერიის საქალაქო სამსახურის უფროსსა და შპს გრინსერვის+-ის დირექტორს შორის გაფორმდა შეთანხმებები და ხელშეკრულებაში შევიდა ცვლილებები, რომლითაც სავალდებულო ექსპერტიზის დასკვნის გარეშე უკვე დამტკიცებული პროექტი შეიცვალა.

უწყების განცხადებით, შინაგან საქმეთა სამინისტროში ჩატარებული გამოძიებით ასევე დადგინდა, რომ 2020 წლის 18 მაისს, ქალაქ თბილისის მერიის გარემოს დაცვის საქალაქო სამსახურსა და შპს LMC-ს შორის გაფორმდა ხელშეკრულება, ვაკის პარკის ტერიტორიაზე არსებული შადრევნებისა და კასკადის რეაბილიტაციის სამუშაოების საპროექტო დოკუმენტაციის შედგენის მომსახურების თაობაზე.

• "პროექტის შედგენის შემდგომ, შპს LMC-მ სათანადო ექსპერტიზის დასკვნის გაცემის მიზნით, რაც ვაკის პარკის ტერიტორიაზე არსებული შადრევნებისა და კასკადის სარეაბილიტაციო სამუშაოების საპროექტო-სახარჯთაღრიცხვო დოკუმენტაციის მოქმედი ტექნიკური რეგულირების დოკუმენტებთან შესაბამისობის დადგენას მოიცავდა, შპს ექსპერტიზა, მშენებლობა დიზაინს მიმართა";
• "2020 წლის 15 სექტემბერს და 2021 წლის 2 ივნისს, შპს ექსპერტიზა, მშენებლობა დიზაინის ინჟინერ-კონსტრუქტორმა დაამზადა ყალბი ინსპექტირების ანგარიში, რომლის თანახმად პროექტი თითქოს შესრულებული იყო სამშენებლო და უსაფრთხოების ნორმების დაცვით";
• "მან, ინსპექტირების ჩამტარებელ ექსპერტებად ანგარიშში მიუთითა ისეთი რვა პირი რომლებსაც შპს ექსპერტიზა, მშენებლობა დიზაინში არასდროს უმუშავიათ, შესაბამისად არც ინსპექტირების ჩატარებაში მიუღიათ მონაწილეობა";
• "რეალურად ხსენებულ დოკუმენტებზე 8 ექსპერტის ნაცვლად, ხელი მოაწერა შპს ექსპერტიზა, მშენებლობა დიზაინის ინჟინერ-კონსტრუქტორმა და შპს LMC-ის წარმომადგენლებს გაყალბებული დასკვნები გადასცა", — წერია პროკურატურის განცხადებაში.