ასე ეხმაურება შინაგან საქმეთა მინისტრის მოადგილე სახელმწიფო დეპარტამენტის ანგარიშს. მის კომენტარს საზოგადოებრივი მაუწყებელი ავრცელებს.

რატომ არის მნიშვნელოვანი: აშშ-ის სახელმწიფო დეპარტამენტის მიერ გუშინ, 28 თებერვლას გამოქვეყნებულ ანგარიშში ნათქვამი იყო, რომ ულტრამემარჯვენე ჯგუფებმა 5 ივლისს ჟურნალისტებსა და აქტივისტებზე იძალადეს.

  • აღნიშნული იყო, რომ იმავე ჯგუფებმა დაარბიეს ოპოზიციის საპროტესტო აქცია პარლამენტთან, სადაც სცადეს შტურმი პარლამენტზე და თავს დაესხნენ არასამთავრობო ორგანიზაციის ოფისებს.
  • ასევე, ვკითხულობთ, რომ შსს-მ მთელი დღის განმავლობაში ვერ შეძლო არეულობის კონტროლი.
  • გარდა ამისა, ხაზგასმული იყო ისიც, რომ მიუხედავად 28 მოძალადის დაკავების და გასამართლებისა, ჯგუფის არც ერთი ლიდერი ან ძალადობის ორგანიზატორი პასუხისგებაში არაა მიცემული.
  • "ეს მოვლენები მას შემდეგ მოხდა, რაც პრემიერმინისტრმა Tbilisi Pride-ის დაგეგმილ ღონისძიებას მიზანშეუწონელი უწოდა", — განაცხადა დეპარტამენტმა.

დეტალები: დარახველიძემ "არასწორი" უწოდა განცხადებას, რომ 5 ივლისის საქმის რამე ნაწილზე ან მიმართულებაზე უწყებამ არ იმუშავა.

  • "როცა სისხლის სამართლის წესით პასუხისგებაზე ვსაუბრობთ, იმისთვის, რომ ადამიანს ბრალდება წაუყენო, საკმარისი მტკიცებულება უნდა არსებობდეს".
  • მინისტრის მოადგილის თქმით, გამოძიება სისხლის სამართლის 12 სხვადასხვა საქმეზე აწარმოეს, შეიკრიბა ათასზე მეტი მტკიცებულება და პასუხისგებაში მიეცა 31 პირი.
  • ასევე, 100-ზე მეტი ადამიანი დაკავებულია ადმინისტრაციულად, ხოლო 300-ზე მეტი მოწმეა დაკითხული.
  • დარახველიძე ამტკიცებს, რომ პოლიციამ მაქსიმუმი გააკეთა და სადაც "საკმარისი მტკიცებულება და სტანდარტი გამოიკვეთა, ადამიანები მართლმსაჯულების წინაშე წარსდგნენ".

2021 წლის 5 ივლისს რუსთაველის გამზირზე, სადაც ღირსების მარში იყო დაგეგმილი, პრორუსულმა ძალადობრივმა ჯგუფებმა და სასულიერო პირებმა დააორგანიზეს ძალადობა.

  • დაარბიეს აქტივისტების ოფისები, იძალადეს 50-ზე მეტ ჟურნალისტზე — 5 ივლისს ნაცემი ოპერატორი ლექსო ლაშქარავა გარდაიცვალა.
  • 5 ივლისს დილით ღარიბაშვილმა თქვა, რომ დაანონსებული მარშის ჩატარება მიზანშეუწონლად მიმაჩნია.
  • ამტკიცებდა, რომ "ასეთი ტიპის აქციები და ღონისძიებები" პირიქით, უმცირესობების დისკრიმინაციას უწყობს ხელს.