ამის შესახებ დეპუტატმა, ბექა ლილუაშვილმა პარლამენტში, ბრიფინგზე ისაუბრა.

რატომ არის მნიშვნელოვანი: პარტიაში ამბობენ, რომ ოკუპანტი რუსეთი საქართველოს უსაფრთხოებისა და დამოუკიდებლობის საწინააღმდეგო პროპაგანდას იყენებს და ქვეყნის ევროპული განვითარების გზას აზიანებს.

  • მათივე განცხადებით, ამ პირობებში, ქართული ოცნება ებრძვის არა ქვეყნის ნამდვილ მტერს, არამედ — სტრატეგიულ პარტნიორებსა და მეგობრებს.
  • "ხელისუფლება მოქმედებს საპირისპიროდ, "აგენტების" კანონის სამიზნედ აქცევს არა ოკუპანტ ქვეყანას, არამედ ჩვენს სტრატეგიულ პარტნიორებსა და მეგობრებს. ამ ინიციატივით ხელისუფლება ცდილობს, დასვას ტოლობის ნიშანი მეგობრებსა და მტერს შორის", — თქვა ლილუაშვილმა.

დეტალები: მისივე განცხადებით, ხელისუფლებას ეროვნული და კონსტიტუციური მიზნის შეცვლის უფლებას ვერ მისცემენ.

  • "ამიტომ პარტია საქართველოსთვის საპარლამენტო გუნდი ვაინიცირებთ კანონის პროექტს ოკუპანტი ქვეყნის რუსეთის ფედერაციის გავლენისგან დაცვის შესახებ, რომლის მიზანია, ამ ქვეყანაში გამოაშკარავდეს რუსეთის ფარული გავლენების წყაროები, ქვეყნის ინტერესების საწინააღმდეგო ქმედებები და მათი განმახორციელებელი პირები", — თქვა ლილუაშვილმა.
  • ოპოზიციურ პარტიაში ამბობენ, რომ კანონპროექტი ყველაფერს თავის სახელს არქმევს და მისი ერთადერთი მიზანია, მტერს მტერი ეწოდებოდეს.
  • "ოცნების" ხელისუფლება პოლიტიკური თაღლითობით ცდილობს და უნდა, რომ ერთ სიბრტყეზე დააყენოს სტრატეგიული პარტნიორები და ქვეყნის ოკუპანტი. ეყოთ გამბედაობა, მტერი დაუძახონ რუსეთს და არა ჩვენი ქვეყნის პარტნიორებს და ამ ინიციატივას მხარი დაუჭირონ", — ამბობს საქართველოსთვის დეპუტატი.
  • ლილუაშვილის ინფორმაციით, კანონპროექტის მხარდაჭერის მიზნით კოლეგებთან კონსულტაციას დღესვე დაიწყებენ.