საერთაშორისო გამჭვირვალობა-საქართველომ (TI) პოლიტიკური შემოწირულებების კვარტალურ ანგარიში გამოაქვეყნა.

რატომ არის მნიშვნელოვანი: ალტ-ინფო პრორუსული, ანტიდასავლური, ძალადობრივი დაჯგუფებაა.

  • ჯგუფი გამუდმებით აჟღერებს ანტიდასავლურ გზავნილებს, ასევე პრორუსულ ნარატივებსაც, რომლებიც ხშირად კრემლის სტრატეგიულ გზავნილებთან თანხვედრაშია.
  • სწორედ ამ ჯგუფებმა დააორგანიზეს ძალადობა, დაარბიეს აქტივისტების ოფისები, იძალადეს 50-ზე მეტ ჟურნალისტზე — 5 ივლისს ნაცემი ოპერატორი ლექსო ლაშქარავა გარდაიცვალა.

დეტალები: TI-ს ანგარიშის მიხედვით, 2022 წლის 1 ოქტომბრიდან 31 დეკემბრის ჩათვლით ყველა პარტიამ ჯამში 742 230 ლარის ოდენობის შემოწირულება მიიღო.

  • აქედან 370 000 ლარი (50%) მმართველმა პარტიამ, 158 098 — ალტ-ინფომ, ხოლო 151 337 ლარის შემოწირულება ლელომ მიიღო.
  • რაც შეეხება შემომწირველების რაოდენობით ალტ-ინფოს პარტია კონსერვატიული მოძრაობა პირველ ადგილზეა — 168 შემომწირველით.
  • მეორე ადგილზეა ლელო, რომელსაც ჰყავდა 14 შემომწირველი, მესამეზე კი ევროპული საქართველო — 13.

ფოტო: TI

ფოტო: TI

გარდა ამისა, TI-ს განცხადებით, საანგარიშო პერიოდში ქართულმა ოცნებამ 370 000 ლარის ოდენობის შემოწირულება მიიღო.

  • ორგანიზაციის ცნობით, დონორთა უმრავლესობა მმართველ პარტიასთან დაკავშირებულ მსხვილ ბიზნესჯგუფებს წარმოადგენს.

ანგარიშში აღნიშნულია, რომ საანგარიშო პერიოდში მმართველი პარტიის შემომწირველებთან დაკავშირებულმა კომპანიებმა ჯამურად 102 მილიონი ლარის ღირებულების ტენდერებში გაიმარჯვეს, წარსულში კი სულ 223 მილიონი ლარის ღირებულების ტენდერები აქვთ მოგებული.

  • ამავე პერიოდში მმართველი პარტიის დონორებთან დაკავშირებულმა კომპანიებმა 51 000 ლარის ღირებულების პირდაპირი შესყიდვის კონტრაქტები მიიღეს, წარსულში კი მათ სულ 19 მილიონი ლარის პირდაპირი კონტრაქტი აქვთ მიღებული.
  • საანგარიშო პერიოდში სახელმწიფო აუდიტის სამსახურს არცერთი პარტიის ან შემომწირველის მიმართ სანქცია არ გამოუყენებია.

არქივიდან: კვლევის მიხედვით, 2022 წლის 1 იანვრიდან 30 სექტემბრის ჩათვლით ყველა პარტიამ ჯამში 1 944 073 ლარის ოდენობის შემოწირულება მიიღო.

  • აქედან 666 000 ლარი (34%) მმართველმა პარტიამ, 393 611 — ალტ-ინფომ, ხოლო 370 600 ლარის შემოწირულობა ლელომ მიიღო.