გავრცელებული ინფორმაციით, მალე The Rolling Stones-ისა და პოლ მაკარტნის საერთო ნამუშევარს მოვისმენთ. The Rolling Stones დიდი ხანია, ახალ ალბომზე მუშაობს, ახლა კი ცნობილი გახდა, რომ მათთან ერთად პოლ მაკარტნი ერთ-ერთ სიმღერაში ბას-გიტარაზე დაუკრავს. Variety-ის მიხედვით, The Rolling Stones-ის ახალ ალბომის შექმნაში რინგო სტარმაც მიიღო მონაწილეობა, თუმცა ჯერჯერობით უცნობია, ის და პოლ მაკარტნი ერთ სიმღერაზე მუშაობდნენ, თუ არა.

The Rolling Stones-ის წევრები უკვე რამდენიმე კვირაა ლოს-ანჯელესში იმყოფებიან და ახალი სიმღერებზე მუშაობენ. მართალია, მათი პროექტი დასასრულს უახლოვდება, თუმცა მედიაში დეტალების შესახებ ინფორმაცია არ ვრცელდება. ჯერჯერობით უცნობია, თუ როდის მოვისმენთ The Rolling Stones-ისა და The Beatles-ის წევრების საერთო შემოქმედებას.

ფოტო: Getty Images

The Rolling Stones-მა 2020 წლის აპრილში ახალი სიმღერა Living in a Ghost Town გამოუშვა. 2021 წელს მიკ ჯაგერმა ინტერვიუში განაცხადა, რომ ახალი ალბომისთვის ბევრი სიმღერა ჰქონდათ მზად. როგორც ცნობილია, The Rolling Stones ახალი ალბომის გამოშვებას უფრო ადრეც გეგმავდა, თუმცა პანდემიის გამო მუშაობის პროცესი გახანგრძლივდა. ასე რომ, ჯგუფების მსმენელებს ამ ეტაპზე მხოლოდ ლოდინი დაგვრჩენია.