ამერიკელი სენატორები ჯინ შაჰინი და დიკ დურბინი მიუნხენის კონფერენციის შემდეგ საქართველოში ოფიციალური ვიზიტით იმყოფებიან.

რატომ არის მნიშვნელოვანი: აშშ-ის საელჩოს ინფორმაციით, ვიზიტის ფარგლებში შაჰინი და დურბინი შეხვდებიან სახელმწიფოების მეთაურებს, საკანონმდებლო ორგანოების წევრებსა და სამოქალაქო საზოგადოების წარმომადგენლებს, რათა განიხილონ ქვეყნების ორმხრივი ურთიერთობები, ასევე შავი ზღვის რეგიონის გეოპოლიტიკური მნიშვნელობა.

  • შაჰინის განცხადებით, საქართველოს წინ მნიშვნელოვანი არჩევნები და დემოკრატიული დღის წესრიგის წინსვლის შესაძლებლობა აქვს.
  • დურბინმა კი თქვა, რომ საქართველომ ძალიან კარგად იცის პუტინიდან მომავალი საფრთხე.

დეტალები: დღეს, 19 თებერვალს სენატორებმა მიღება გამართეს, რომელსაც სხვადასხვა სფეროს წარმომადგენლები ესწრებოდნენ, მათ შორის, პოლიტიკოსებიც.

  • ოპოზიციური პარტიებიდან მიღებას ესწრებოდნენ ნაციონალური მოძრაობის, ლელოს, მოქალაქეების, საქართველოსთვის, დროას, გირჩი — მეტი თავისუფლების, სტრატეგია აღმაშენებლის წარმომადგენლები.
  • ლელოს ერთ-ერთმა ლიდერმა, სალომე სამადაშვილმა შეხვედრის შემდეგ თქვა, რომ სენატორ შაჰინთან განიხილა ევროკავშირის მიერ გაცემული 12 რეკომენდაცია და ევროკავშირის წევრობის კანდიდატის სტატუსი.
  • ამბობს, რომ საუბრის ერთ-ერთი თემა იყო მთავარი არხის დამფუძნებლის, ნიკა გვარამიას პატიმრობა.

გარდა ამისა, ნაციონალური მოძრაობის ლიდერის განცხადებით, სენატორებთან პირად საუბარში ყურადღება დაეთმო მიხეილ სააკაშვილსა და მის ჯანმრთელობის მდგომარეობას.

  • ასევე ისაუბრეს ხალხის ძალის ინიცირებულ კანონპროექტზე "უცხოური გავლენის აგენტების" შესახებ.