მთავარეპისკოპოსი ზენონ იარაჯული დიდი ბრიტანეთისა და ირლანდიის ეპარქიის მმართველობის საკითხზე Facebook-ზე პოსტს წერს.

რა ხდება: გუშინ, 15 თებერვალს სინოდის სხდომის განჩინება გამოქვეყნდა, სადაც დიდი ბრიტანეთისა და ირლანდიის ეპარქიაზეა საუბარი.

  • განჩინებაში აღნიშნულია, რომ დიდი ბრიტანეთისა და ირლანდიის ეპარქიის ზედამხედველობას დროებით გადაიბარებს პატრიარქი, ხოლო ზენონი (იარაჯული) დარჩება დმანისისა და ლორე-ტაშირის ეპარქიის მმართველ მღვდელმთავრად.
  • ზენონის განცხადებით, სინოდის სხდომის დაწყებამდე ის პირადად შეხვდა ილია მეორეს და თავადვე შესთავაზა აღნიშნული ეპარქია დროებით პატრიარქის უშუალო ზედამხედველობის ქვეშ მოქცეულიყო.
  • მისივე თქმით, პატრიარქმა მიზანშეწონილად მიიჩნია შეთავაზება და სინოდს დადგენილებით მიმართა.
  • ამბობს იმასაც, რომ კრებაზე ეპარქიის საკითხი განსახილველად არ გასულა და ამის შესახებ სინოდი მომავალ სხდომაზე იმსჯელებს.
  • "შესაბამისად განვმარტავ, რომ ეპარქიის საკითხი სამომავლოდ იქნება განხილული, რის შემდეგაც იქნება მიღებული გადაწყვეტილება ეპარქიის მმართველის ვინაობის შესახებ. ასეთი იყო მისი უწმინდესობისა და ჩემი პოზიცია", — წერს მთავარეპისკოპოსი.

რატომ არის მნიშვნელოვანი: ილია მეორემ მეუფე ზენონი 2022 წლის ნოემბერს დიდი ბრიტანეთისა და ჩრდილოეთ ირლანდიის ეპარქიიდან გაათავისუფლა.

  • მაშინ შეუნარჩუნდა დმანისისა და აგარაკ-ტაშირის ეპარქიის მმართველობა.

ზენონი ამბობს, საკითხი კომპლექსური და მეტად საყურადღებოა — "ამ დროისათვის შემოვიფარგლები მცირეოდენი განცხადებით და დავძენ: ჩემს წინააღმდეგ მომართულია გარე და შიდა ძალები, რომელთაც სურთ ჩემი სულიერი და ფიზიკური განადგურება".

  • აცხადებს, რომ არ აპირებს რაიმე სახის პოლემიკაში შევიდეს იმ ადამიანებთან რომელთაც სურთ ამ საკითხების "მიჩქმალვა-ნიველირება და პერსონალური თავდასხმებით ცდილობენ საკუთარი დეგრადირებული აზროვნების ნაყოფის საზოგადოებისთვის თავს მოხვევას".
  • "მათი ქმედებები პირველ რიგში უკავშირდება ჩემს პოზიციას შიდა და საგარეო საეკლესიო პოლიტიკის საკითხებზე, რის შესახებაც საზოგადოებისთვის კარგად არის ცნობილი".
  • წერს, რომ მისი საქმიანობა მართლმადიდებელ ეკლესიაში მუდამ მიმართული იყო ეკლესიისა და სახელმწიფოს ინტერესების დაცვისკენ.
  • "აქვე ვაცხადებ, რომ საქართველოს მართლმადიდებელ ეკლესიაში მიმდინარე ცალკეული პროცესები მიმართულია არა მხოლოდ თავად ეკლესიის, არამედ სახელმწიფოს წინააღმდეგ და უდიდესი სიფრთხილე და გონიერებაა აუცილებელი იმისთვის, რათა ამ პროცესებიდან ეკლესიაც და სახელმწიფოც დაზიანებული არ გამოვიდეს", — ამბობს წენონი.