კრემლის პრესსპიკერის განცხადებას რუსული პროპაგანდისტული სამთავრობო მედია ავრცელებს.

რა მოხდა: ბორის ჯონსონის განცხადებით, მას თებერვალში პუტინთან გრძელი სატელეფონო ზარი ჰქონდა, სადაც ოკუპანტი ქვეყნის ლიდერს არწმუნებდა, რომ რუსეთ-უკრაინის ომი სრული კატასტროფა იქნებოდა.

  • მისივე თქმით, პუტინი გააფრთხილა, რომ რუსეთის უკრაინაში შეჭრა დასავლეთის სანქციებსა და რუსეთის საზღვრებთან ნატოს მეტი ჯარის განლაგებას გამოიწვევდა.
  • ჯონსონი იხსენებს, რომ საპასუხოდ პუტინი მას სარაკეტო დარტყმით დაემუქრა და განუცხადა: "ბორის, არ მინდა ზიანი მოგაყენო, მაგრამ რაკეტით ამას მხოლოდ ერთი წუთი დასჭირდება".

დეტალები: დიმიტრი პესკოვმა ჯონსონის სიტყვებს ტყუილი უწოდა.

  • "რაც მისტერ ჯონსონმა თქვა, სიმართლეს არ შეესაბამება. უფრო სწორად, სიცრუეა", — თქვა მან.
  • პესკოვი ამბობს, რომ ჯონსონმა ეს განცხადება მიზანმიმართულად ან გაუაზრებლად გააკეთა.
  • "რაკეტებით მუქარა არ ყოფილა. რუსეთის უსაფრთხოების გამოწვევებზე საუბრისას პრეზიდენტმა პუტინმა აღნიშნა, რომ თუ უკრაინა შეუერთდება ნატოს, ნატოსა ან ამერიკული რაკეტების პოტენციური განლაგება ჩვენს საზღვრებზე ნიშნავს, რომ ნებისმიერი რაკეტა მოსკოვს რამდენიმე წუთში მიაღწევს. თუ ეს მონაკვეთი ასე აღიქმებოდა, ეს ძალიან უხერხული სიტუაციაა".