მითების დეტექტორმა ის Facebook მომხმარებლები შეისწავლა, რომლებიც ლევან ბერძენიშვილს თავს ესხმიან.

რა ხდება: მას შემდეგ რაც ბერძენიშვილმა მეფე ერეკლეს შესახებ ისაუბრა, მის წინააღმდეგ დისკრედიტაციის კამპანია დაიწყო, რომელსაც კოორდინირებული სახე აქვს.

• ბერძენიშვილს აკრიტიკებდნენ მმართველი გუნდის წევრები და მათთან აფილირებული პირები;
• იყო რამდენიმე შემთხვევაც, როცა მას ქუჩაში უცხო პირებმა სიტყვიერი შეურაცხყოფა მიაყენეს.
• გარდა ამისა, რამდენიმე თვის წინ დეპუტატ სამნიძეს და ლევან ბერძენიშვილის ძმას თავს დაესხნენ. როგორც ბერძენიშვილმა ჟურნალისტებს უთხრა, ერთ-ერთმა მოძალადემ თქვა: "შენ და შენი ძმა, ჩვენს წმინდას როგორ აგინებთ".
• 15 იანვარს ყვარლის ევრო-ატლანტიკურ ცენტრში ძალადობრივი ჯგუფები ბერძენიშვილს პიკეტით დახვდნენ და ლექციის ჩატარების უფლება არ მისცეს.
• შეკრებილები ამბობდნენ, რომ "ერეკლე მეფის მოღალატედ შემრაცხველს" კახეთში არ ელოდნენ.
• DRI-ის შეფასებით, ბერძენიშვილზე მოძალადე ჯგუფების თავდასხმები ხელისუფლების წახალისებულია.

რატომ არის მნიშვნელოვანი: 22 იანვარს სახელისუფლებო სარედაქციო პოლიტიკის POS TV-ის ჟურნალისტმა ნათია ბერიძემ გაავრცელა ვიდეო, რომელშიც ის ლევან ბერძენიშვილს სიტყვიერ შეურაცხყოფას აყენებს.

• გავრცელებულ ვიდეოში ჩანს, რომ ერეკლე II-ის კრიტიკის გამო ის ერთ-ერთ შენობასთან ბერძენიშვილს არაკაცს უწოდებს და აღნიშნავს, რომ ამ სიტყვებს მთელი ქართველი ერის სახელით ამბობს.
• ეს ვიდეო კიდევ ერთი მიზეზი გახდა პროსახელისუფლებო აქტორებისთვის, რომ ბერძენიშვილის დისკრედიტაცია გაეგრძელებინათ.

ვინ არის ნათია ბერიძე: მითების დეტექტორი განმარტავს, რომ PosTV-ის მოქმედი ჟურნალისტი წარსულში ჩართული იყო კოკა ყანდიაშვილთან და Espersona-სთან დაკავშირებულ ქსელში, რომელიც ფეისბუქმა არაავთენტური და კოორდინირებულ ქცევის გამო წაშალა.

• ესპერსონას ფეისბუქ გვერდი სოციალურ მედიაში სულ მცირე 14 ჯგუფს მართავდა, რომელთა შორისაც ერთ-ერთის ადმინისტრატორი ნათია ბერიძე იყო.
• დეტექტორის განმარტებით, ბერიძე 2020 წლის დეკემბრამდე ესპერსონას ჟურნალისტი იყო და სწორედ ფეისბუკის სანქციების დაწესების დღეს, 20 დეკემბერს დატოვა რედაქცია, 2021 წლიდან კი PosTV-ის ჟურნალისტია.

სახელისუფლებო აქტორები: მითების დეტექტორის ხაზს უსვამს, რომ ვიდეოს გამოქვეყნებიდან მალევე, სხვა ქართულ ოცნებასთან დაკავშირებული პირებიც გააქტიურდნენ. კერძოდ:

• ექსპერტმა, გია აბაშიძემ ბერიძის ვიდეო გამოქვეყნებიდან ზუსტად 3 წუთში ატვირთა და დაწერა, რომ ბერძენიშვილი "სადმე ნაცმედიაში მიზანმიმართულად დევნაში სუსსა და ოცნების აქტივისტებს დაადანაშაულებს", სინამდვილეში კი ეს მის წინააღმდეგ მიმართული კრიტიკა Vox Populi (ხალხის ხმა) არის.
• გარდა ამისა, ორგანიზაცია აღნიშნავს, რომ ბერიძის ვიდეოს გავრცელებიდან (21:13) რამდენიმე წუთის შემდეგ (21:40) POSTV — ანალიტიკა-მ სიუჟეტი გამოაქვეყნა სათაურით "ლევან ბერძენიშვილის სირცხვილის საგა".
• რომელშიც ბერძენიშვილის როგორც პოლიტიკური, ასევე სამეცნიერო საქმიანობა ნეგატიურად იყო შეფასებული.
• ასევე აღნიშნული იყო ისიც, "რომ ბერძენიშვილს ამპარტავნება ქართველი ხალხის რისხვად დაუჯდა", რის საილუსტრაციოდაც კახეთში მოწყობილი პროტესტები იყო ნაჩვენები — მოგვიანებით PosTV-მ სიუჟეტი წაშალა.

პრორუსული აქტორები: მითების დეტექტორის განმარტებით, ნათია ბერიძის ვიდეო სოციალურ ქსელში პრორუსულ კონსერვატიულ მოძრაობასა და ძალადობრივ ალტ-ინფოსთან დაკავშირებულმა ფეისბუკ ანგარიშებმა აიტაცეს.

• მონიტორინგის შედეგად, დისკრედიტაციის კამპანიაში ჩართული 12 ფეისბუქგვერდი, 13 ჯგუფი, 4 ანონიმური ანგარიში, ასევე, სახელისუფლებო სარედაქციო პოლიტიკის მქონე და სხვა ონლაინ მედიები გამოვლინდა.
• ვიდეო ხელისუფლების მხარდამჭერ და ოპონენტების მადისკრედიტირებელ გვერდებზეც გავრცელდა.
• ასევე, ძალადობრივი ჯგუფის ლიდერმა, შოთა მარტინენკომ, ალტ-ინფოსა და კონსერვატიულ მოძრაობასთან დაკავშირებულმა გვერდებმა გაავრცელეს.
• მითების დეტექტორის მიერ თანდართულ სქრინში ვხედავთ, რომ ფეისბუქგვერდის, არ აგარევინებთ, გამოქვეყნებული ვიდეო დასპონსორებულია, თანხის გადამხდელად კი Davit Davitashvili არის მითითებული.
• მათი განმარტებით, ფეისბუკ ჯგუფების უმრავლესობა (7ჯგუფი), სადაც ნათია ბერიძის ვიდეო გავრცელდა, ქართულ ოცნებასთან არის დაკავშირებული.

ონლაინ მედიები: როგორც მითების დეტექტორი წერს, ვიდეო გაავრცელეს როგორც პრო-სახელისუფლებო სარედაქციო პოლიტიკის მქონე ონლაინ მედიებმა (primetime.ge tia.ge, mpn.ge, timer.ge split.spnews.io, digest.pia.ge, resonancedaily.com, mixmetronome.ge).

• ასევე პრორუსულმა (news-front) და სხვა (news.ge, newsline.ge, itar.ge, Newposts.ge) საინფორმაციო სააგენტოებმაც.