რეკეტი, გამოძალვა, თაღლითობა, დაქირავებული ქილერობა, კონტრაბანდა, იარაღის უკანონო შენახვა-ტარება და ძარცვა - ეს არის იმ ბრალდებების არასრული სია, რაც ნიუ-იორკის პროკურატურამ კრიმინალური დაჯგუფების წევრებს წაუყენა. ამერიკელი სამართალდამცავები ამ დაჯგუფებას რუსულ-ქართულ კრიმინალურ სინდიკატად მოიხსენიებენ, დაკავებულთა უმრავლესობა კი ნიუ-იორკში, ბრუკლინში ცხოვრობდა.

დაკავებულთა შორის არიან ქართული გვარ-სახელის მქონე პირები, მათთვის წაყენებული ბრალდებებისთვის მაქსიმალური სასჯელი იწყება ხუთწლიანი პატიმრობიდან და მთავრდება სამუდამო პატიმრობით.

პროკურორმა ჯოონ კიმმა თქვა, რომ დაკავებულია რუსული კრიმინალური დაჯგუფების 33 წევრი, რომელთაც ხელმძღვანელობდნენ ე.წ. კანონიერი ქურდები, ისინი დანაშაულს ამერიკის სხვადასხვა შტატში ორგანიზებულად ჩადიოდნენ. სპეცოპერაციაში მონაწილეობდა ნიუ-იორკის პოლიცია, გამოძიების ფედერალური ბიურო (FBI) და აშშ-ს საზღვრის დაცვის სამსახური (CBP).

აშშ-ს იუსტიციის დეპარტამენტის განცხადებაში ნათქვამია, რომ კრიმინალური სინდიკატის ხელმძღვანელი იყო ე.წ. კანონიერი ქურდი რაჟდენ შულაია, რომლის მეტსახელები იყო "ძმა", "რომა". შულაიას მარჯვენა ხელი იყო ზურაბ ჯანაშვილი, რომლებიც დაჯგუფების სხვა წევრებთან ერთად ცდილობდნენ დანაშაულებრივი გზით ეშოვათ ფული და მათი უკანონო ქმედებები მრავალფეროვანი იყო. დაკავებულთა შორის 15-ზე მეტი ქართული გვარ-სახელის მქონე პირია.

საინტერესოა ის ფაქტი, რომ იუსტიციის დეპარტამენტს დეტალურად აქვს განმარტებული, რას ნიშნავს ე.წ. კანონიერი ქურდი, როგორ შეიქმნა ეს ინსტიტუტი საბჭოთა კავშირის დროს და როგორ მუშაობს. ამერიკელი სამართალდამცავების ცნობით, დაკავებულები დაბადებულნი არიან საბჭოთა უკრაინის, რუსეთისა და საქართველოს ტერიტორიაზე, ამჟამად კი ნიო-ორკში ცხოვრობენ.