ნათლია უამრავი ადამიანისთვის ოჯახის წევრივით ახლობელი და ძვირფასია. ამ განსაკუთრებულ კავშირზე არა მხოლოდ საზოგადოება და რელიგია, არამედ უამრავი ანიმაციური თუ არაანიმაციური შედევრიც გვესაუბრება. ამ 5 ნათლიას მაყურებელი მთელს მსოფლიოში მშვენივრად იცნობს და უყვარს, ამიტომ გვგონია, შენც აუცილებლად გეცოდინება. თუკი ეს ფილმები, რაღაც სასწაულის წყალობით, ჯერ კიდევ არ გაქვს ნანახი, მაშინ გირჩევთ, რომ მეტად აღარ გადადო და აუცილებლად გაეცნო.

მაშ ასე, ნახე 5 ფილმი ყველაზე ცნობილი ნათლიებით:

1. კონკიას ფერია ნათლია — კონკია (Cinderella)

ვის არ გვინატრია ასეთი ნათლია, როცა წვეულებაზე ანდა პაემანზე წასასვლელად მთელი ჩვენი გარდერობი გადმოგვიყირავებია, თუმცა მოსაწონი მაინც ვერაფერი გვინახავს. იმაზე რომ არაფერი ვთქვათ, როცა თავს სრულიად მარტო და დამარცხებულად ვგრძნობთ, რა მნიშვნელოვანია გვერდით ისეთი ადამიანის ყოლა, რომელსაც ჩვენი გამხნევება და სიყვარული შეუძლია.

2. მძინარე მზეთუნახავის ფერია ნათლიები — მძინარე მზეთუნახავი (Sleeping Beauty)

მძინარე მზეთუნახავის ნათლიები მისთვის არა მხოლოდ გაჭირვების ტალკვესები, არამედ აღმზრდელებიც იყვნენ და საკუთარი შვილივით ევლებოდნენ თავს. აურორას გამო არც საკუთარი ცხოვრების შეცვლასა და ტყეში გადასახლებაზე დაუხევიათ უკან და არც დროებით ჯადოქრობის დათმობაზე, იმისთვის, რომ მათი ნათლული უსაფრთხოდ ყოფილიყო და მალეფისენტს მისთვის არ მიეგნო. ასეთი თავგანწირვა და ერთგულება ზღაპრებშიც კი იშვიათია.

3. მოჯადოებული ელას ნათლია — მოჯადოებული ელა (Ella Enchanted)

ყველას კონკიასა და მძინარე მზეთუნახავის მსგავსი ნათლია როდი ჰყავს, ყოველთვის მხსნელად ევლინებოდეს და თავზე ევლებოდეს. ზოგიერთი ნათლია თავადაა გზააბნეული და დაუფიქრებელი. მაგალითად, მოჯადოებული ელას ფერია ნათლია, რომელმაც ახალდაბადებულ ჩვილს "ნიჭად" მორჩილება დაანათლა. საბრალო ელას უწევდა ნებისმიერი ადამიანისთვის ნებისმიერი სურვილი შეესრულებინა, სანამ ერთ დღესაც საკუთარ თავში ძალა და სიყვარული არ იპოვა.

4. სირიუსი — ჰარი პოტერის ფილმები (Harry Potter Franchise)

სირიუსი ჰარის პოტერის ნათლია და გარდაცვლილი მშობლების საუკეთესო მეგობარი იყო, რომლის სახითაც ჰარიმ თითქოს ოჯახი იპოვა, სანამ მის თავს ისევ არ წაართმევდნენ. ამის მიუხედავად, ის სიყვარული და მხარდაჭერა, რაც სირიუსმა ჰარის ხანმოკლე დროში აგრძნობინა, მას მთელი სიცოცხლე დამცველ თილისმად გაჰყვა თან.

5. ვიტო კორლეონე — ნათლია (The Godfather)

დონ ვიტო კორლეონე სინამდვილეში მხოლოდ ჯონი ფონტეინის ნათლია იყო, თუმცა კიდევ უამრავი ადამიანის ცხოვრებაში ასრულებდა ნათლიისა და მხსნელის როლს. დიდი თუ პატარა მასთან გარბოდა დახმარების სათხოვნელად და თუმცა დონს მაგიური ხრიკები და ჯადოქრობა არ შეეძლო, ბევრისთვის მაინც ჯადოსნური ნათლიის ტიტულით სარგებლობდა, იმდენად ყოვლისშემძლე იყო.