ამის შესახებ უკრაინის პრეზიდენტმა 13 იანვრის ვიდეომიმართვაში ისაუბრა.

რატომ არის მნიშვნელოვანი: ბოლო ორი კვირის განმავლობაში დონეცკის ოლქის პატარა ქალაქი სოლედარი ფრონტის ყველაზე ცხელ წერტილად იქცა.

  • მას ახლა ბახმუტის გასაღებსაც ეძახიან — მისი დაპყრობის პერსპექტივა რუსეთის წარმატების გარანტიას არ იძლევა, მაგრამ, საგრძნობლად გაიზრდება საშიშროება, რომ დაეცემა ბახმუტიც, რომელსაც ოკუპანტები უკვე თვეებია, შტურმით ებრძვიან.
  • თუმცა, რუსეთისთვის სოლედარს სტრატეგიულზე მეტად პროპაგანდისტული მნიშვნელობა აქვს — სურს, მთელი რიგი წარუმატებლობის შემდეგ რაიმე სახის გამარჯვება მოიპოვოს.

დეტალები: ზელენსკის განცხადებით, ბახმუტს საერთაშორისო ლეგიონისა და შამანის რაზმის მებრძოლები იცავენ, სოლედარში კი მტერს კრაკენის მეომრები ანადგურებენ.

  • "მადლობა კრაკენის მებრძოლებს სოლედარში მტრის განადგურების გადამწყვეტი ქმედებებისთვის. მადლობა GUR MO-ის საერთაშორისო ლეგიონის სამხედროებსა და შამანის ქვედანაყოფს, რომლებიც გაბედულად იცავენ ბახმუტს", — თქვა მან.
  • ზელენსკიმ აღნიშნა, რომ რთული ბრძოლა დონბასისთვის, მათ შორის, სოლედარისთვის, ბახმუტისა და კრემენნაიასთვის, გრძელდება.