რამდენიმე დღეა, დასავლეთ საქართველოში ძლიერი ქარია.

რატომ არის მნიშვნელოვანი: სტიქიის შედეგად დაზიანდა ელექტროგადამცემი ხაზები და ბუნებრივი აირის მილები, რის გამოც ზოგიერთ რეგიონში ჯერ კიდევ არ აქვთ გაზი და ელექტროენერგია.

• ქარმა სახურავი გადახადა საცხოვრებელ სახლებს, დააზიანა სასკოლო ინფრასტრუქტურა, საახალწლო ნაძვის ხეები და განათებები.
• ძლიერი ქარის შედეგად წაქცეული ხეების გამო პერიოდულად იხერგება გზებიც.
• მუნიციპალიტეტები მოსახლეობას მოუწოდებენ, სტიქიით გამოწვეული სხვადასხვა სახის საფრთხის ან დაზიანების შემთხვევაში, მიმართონ გადაუდებელი დახმარების ოპერატიული მართვის ცენტრს, 112-ს ან დარეკონ თვითმმართველი ორგანოების ცხელ ხაზზე.

დეტალები: სენაკში ქარისგან მოგლეჯილი ხე სამარშრუტო ტაქსის დაეცა; დაშავდა სამი მგზავრი, რომლებიც სენაკის საავადმყოფოში გადაიყვანეს.

• მოგლეჯილმა ხეებმა პრობლემები შექმნა მოძრაობის მხრივაც, დაზიანდა ტროტუარები.
• სამეგრელო-ზემო სვანეთის სახელმწიფო რწმუნებულის, გიორგი გუგუჩიას განცხადებით, სტიქიის შედეგად რეგიონში 600-ზე მეტი საცხოვრებელი სახლის სახურავი დაზიანდა.
• "ასევე, დაზიანებულია სამი საჯარო სკოლის სახურავი. ელექტრო ენერგია არ მიეწოდება ქალაქ ფოთის უმეტეს ნაწილს და რეგიონის სამოცამდე სოფელს", — ამბობს რწმუნებული.

აბაშაში სტიქიისგან შექმნილი ვითარების გამო საგანგებო თათბირი გაიმართა.

• ძლიერი ქარის შედეგად დაზიანებულია ელექტროგადამცემი ხაზები, მოგლეჯილია ხეები და ჩახერგილია გზები.
• საცხოვრებელ სახლებზე გადახდილია სახურავები, დაზიანებულია სასკოლო ინფრასტრუქტურა და საახალწლო განათებები.
• ელექტროენერგია არ მიეწოდება რამდენიმე ადმინისტრაციულ ერთეულს.
• მუნიციპალიტეტის მერის განცხადებით, სტიქიით მიყენებულ ზარალს სპეციალური კომისია დაითვლის.

ზუგდიდში მერიის შესაბამისი სამსახურები საგანგებო რეჟიმში მუშაობენ.

• ქარმა დააზიანა ელექტროგადამცემი ხაზები, საცხოვრებელი სახლების სახურავები და წააქცია ხეები.

ფოთსა და ხობში პრობლემები შეექმნა ბუნებრივი აირის მილებს, რის გამოც მოსახლეობას გაზი არ მიწოდება.

• ორივე ქალაქში ბუნებრივი აირის მიწოდების აღსადგენად შესაბამისი სამსახურები მუშაობენ.
• ფოთის ცენტრალურ პარკში ძლიერმა ქარმა მრავალწლიანი ხეები დააზიანა.
• ადგილობრივი მედიის ინფორმაციით, ხე დაეცა მერიის თანამშრომელსაც, რომელიც ადგილზე სტიქიის შედეგების გადასაღებად მივიდა.

სამტრედიაში ძლიერი ქარის შედეგად რესპუბლიკის ქუჩაზე წაქცეულმა ხეებმა დააზიანეს ელექტრო სადენები, საახალწლო განათებები, ქვაფენილი და დეკორატიული ღობეები.

• სამტრედიაში ქარმა, ასევე, წააქცია საახალწლო ნაძვის ხე და ახლოს მდებარე სარეკლამო მონიტორი.

ქუთაისში ძლიერი ქარისგან მიყენებულ ზიანს მეორე დღეა, ებრძვიან.

• ქარმა ქალაქის სხვადასხვა უბანში გარკვეული პრობლემები შექმნა: მოგლიჯა ხეები და დააზიანა შენობების სახურავები.
• ქუთაისის მერის, იოსებ ხახალეიშვილის განცხადებით, მოსახლეობის დასახმარებლად მობილიზებულია სპეციალური სამსახურები და ამოქმედებულია ცხელი ხაზი.

ლანჩხუთში ქარმა ხეები წააქცია და ბუნებრივი აირის მილები დააზიანა.

• ქალაქის ცენტრალურ სკვერში წაქცეულია ხე და დაზიანებულია საახალწლო განათებები.
• მერია მოსახლეობას მოუწოდებს, აუცილებელი შემთხვევების გარდა, თავი შეიკავონ ქუჩაში გადაადგილებისგან.