რუსთავი 2-ის გენერალური დირექტორმა, ნიკა გვარამიამ განაცხადა, რომ რაც რუსთავი 2-ის საქმის პროცესზე მიმდინარეობს მართლმსაჯულებისგან შორსაა. მან სასამართლო სხდომას სამი უსინდისო ქალის მხრიდან დანაშაულებრივი საქმიანობა უწოდა და განმარტა, რომ ისინი არიან დაქირავებულები და შესაძლოა ამაში ანაზღაურებასაც იღებდნენ:

"ისინი იმართებიან ერთი კონკრეტული ცენტრიდან. ეს ქალები აუცილებლად აგებენ პასუხს კანონის წინაშე, კანონი მთელი სიმკაცრით. ასევე არა მხოლოდ ეს უსინდისო ქალები, არამედ ის უსინდისო ქალებიც და კაცებიც, რომლებიც მათ უკან დგანან და ამ სასამართლო შენობაში სხედან და არა მხოლოდ აქ, არამედ იუსტიციის საბჭოში და ის უსირცხვილო მანიაკალური მისწრაფებების მქონე გრაფომანი, რომელიც ყველა მის ქვემდგომ ყმას და ყურმოჭრილ მონას აძლევს დავალებებს, რომ ესე მოიქცნენ პროცესზე".

გვარამიამ ასევე განმარტა, რომ სასამართლომ არ განიხილა მათი შუამდგომლობა მოსამართლე გუჯაბიძის, რომელიც, მისივე თქმით, თაღლითობაშია შემჩნეული, აცილების შესახებ:

"რუსთავი 2-ს საერთოდ დაცვის უფლების გარეშე დატოვა ამ სამმა ზონდერმა მოსამართლემ, მათ შორის ერთ-ერთმა თაღლითმა. უფრო საოცარი ის არის, რომ ამ ვითარებაში პროცესი არ გადადო - ერთია და გუჯაბიძე, რომელზეც ჩვენ, პრაქტიკულად, მამხილებელი სიუჟეტები გავუშვით გუშინ, მოსამართლეს აღარ ვიხმარ მასზე, ამ თაღლითი ქალის აცილების შუამდგომლობაც კი არ განიხილა სასამართლომ. კიდევ ერთხელ ვამბობ ხაზგასმით, უარი კი არ თქვა ამ შუამდგომლობაზე, თქვა, რომ საერთოდ არ ვიხილავ ამ შუამდგომლობასო".

თბილისის სააპელაციო სასამართლოში 7 ივნისს, 10:00 საათზე გაგრძელდება რუსთავი 2-ის საქმის განხილვა. მომდევნო პროცესზე თავის სიტყვას გააგრძელებს ქიბარ ხალვაშის ადვოკატი პაატა სალია. სალია დღეს რამდენიმე საათის განმავლობაში კითხულობდა სიტყვას, თუმცა, სამუშაო საათების დასრულების გამო, სხდომა შეწყდა.