ბოლო დღეებში გავრცელებული ვიდეოჩანაწერი, რომელზეც აღბეჭდილია კონგოში ტყვედ ჩავარდნილი ქართველი მფრინავი, შესაძლოა, თებერვალშია გადაღებული. ინფორმაცია ამის შესახებ სამხრეთ აფრიკაში საქართველოს ელჩმა, ბექა დვალმა მიაწოდა On.ge-ს.

2017 წლის 27 იანვარს, აფრიკაში, კონგოს რესპუბლიკაში, ვერტმფრენი MI-24 ჩამოვარდა. მისი ერთ-ერთი პილოტი ქართველი სამხედრო მფრინავი სოსო ოსორაულია. .

ოსორაული კონგოს 23 მარტის მოძრაობის (M23) მეამბოხეებს ჩაუვარდა ხელში.

საქართველოს ელჩი სამხრეთ აფრიკაში ბექა დვალი On.ge-სთან საუბრისას აცხადებს, რომ საგარეო უწყებას მხოლოდ თებერვლის ბოლოს დაუდასტურდა ოფიციალურად ინფორმაცია, რომ ოსორაული კონგოს უკანონო დაჯგუფების ტყვეა.

დვალის თქმით, მაისის ბოლოს საგარეო უწყებამ მიიღო ინფორმაცია, რომლის მიხედვითაც სოსო ოსორაული შესაძლოა დაღუპული იყოს:

"დაჯგუფებასთან დაკავშირებულ წყაროსგან მიღებული ინფორმაციის მიხედვით, მოხდა შეტაკება, და ქართველი სამხედრო შესაძლოა დაღუპულთა შორის იყოს".

ბექა დვალი ამბობს, რომ ქართული საგარეო უწყება თანამშრომლობს როგორც გაეროსთან, ასევე კონგოს ხელისუფლებასთან, თუმცა აღნიშნულთან დაკავშირებით საბოლოო, ოფიციალურ ინფორმაციას ჯერ არ ფლობს.

რაც შეეხება ფეისბუკზე გავრცელებულ ვიდეოებს, რომლებშიც სოსო ოსორაული აცხადებს, რომ ის უდანაშაულოა, საგარეო უწყების განცხადებით, ვიდეოები ზამთარშია გადაღებული.

ბექა დვალი მოუწოდებს მოქალაქეებს, რომ დამატებითი ინფორმაციის არსებობის შემთხვევაში მიმართონ საგარეო უწყებას.

სოსო ოსორაული კონგოში კერძო კონტრაქტის საფუძველზე, ადგილობრივი ხელისუფლების სამხედრო ოპერაციაში მონაწილეობდა, მისი ვერტმფრენი ამბოხებულებმა ჩამოაგდეს, რის შემდეგაც ის ტყვედ ჩავარდა.