2022 წლის ივნისში ერთ-ერთი ყველაზე გახმაურებული სასამართლო პროცესი დასრულდა — ამბერ ჰერდსა და ჯონი დეპს შორის მიმდინარე დავაში ნაფიცმა მსაჯულებმა მხარი ამ უკანასკნელს დაუჭირეს. მიუხედავად იმისა, რომ ამბერ ჰერდმა სასამართლო გადაწყვეტილება ივლისში გაასაჩივრა, ცოტა ხნის წინ ინსტაგრამზე პოსტი გამოაქვეყნა, რომელშიც განაცხადა, რომ ყოფილ ქმართან დავა მორიგებით დაასრულა.

შეგახსენებთ, რომ ჯონი დეპმა ყოფილ ცოლს, ამბერ ჰერდს ცილისწამებისთვის უჩივლა და ზიანის ასანაზღაურებლად $50 მილიონი მოითხოვა. ჰერდმა 2018 წელს The Washington Post-ში გამოაქვეყნა ოპ-ედი, სადაც განაცხადა, რომ ოჯახში ძალადობის მსხვერპლი იყო. ამბერს ტექსტში ყოფილი ქმრის სახელი არ უხსენებია, თუმცა დეპის სარჩელში აღნიშნული იყო, რომ ოპ-ედი სწორედ მას ეხებოდა, რის გამოც მისი კარიერა დაზიანდა და როლები დაკარგა.

გასაჩივრებული სასამართლო გადაწყვეტილებით, ამბერს ყოფილი ქმრის სასარგებლოდ $10,4 მილიონის გადახდა დაეკისრა. ამბერ ჰერდის ადვოკატმა განაცხადა, რომ მსახიობს საშუალება არ ჰქონდა, ყოფილი ქმრისთვის ამხელა თანხა გადაეხადა.

საბოლოოდ, ამბერმა დავის მორიგებით დასრულების მიზეზები ინსტაგრამზე განმარტა:

"ხანგრძლივი ფიქრის შემდეგ რთული გადაწყვეტილება მივიღე, რომ მორიგებით დავასრულო ცილისწამების შესახებ დავა, რომელიც ჩემმა ყოფილმა ქმარმა ჩემ წინააღმდეგ ვირჯინიის შტატში დაიწყო", — ვკითხულობთ განცხადებაში.

ამბერის თქმით, ასეთი დასასრული არ აურჩევია — მას უბრალოდ საკუთარი სიმართლის დაცვა სურდა, თუმცა, სამწუხაროდ, ამას მისი ცხოვრება შეეწირა. ამბერმა ისიც აღნიშნა, რომ სოციალურ ქსელებში მისი ლანძღვა კიდევ ერთხელ ნათლად გვიჩვენებს, რომ მსხვერპლი ქალები, რომლებიც ხმას აიმაღლებენ, კიდევ ერთხელ ხდებიან მსხვერპლები.

ამბერის თქმით, დავის მორიგებით დასრულება იმას არ ნიშნავს, რომ თავს დამნაშავედ აღიარებს:

"ეს გადაწყვეტილება იმიტომ მივიღე, რომ ამერიკული სასამართლო სისტემის ნდობა დავკარგე. აქ ჩემი დაუცველი ჩვენება გართობასა და სოციალური ქსელების გამოკვებას ემსახურებოდა."

ამბერის თქმით, როცა იმავე საქმეზე დავა დიდ ბრიტანეთში გაიმარჯვა, სასამართლომ ამბერი გაამართლა და ოჯახში და სექსუალური ძალადობის მსხვერპლადაც აღიარა. აშშ-ში კი მსახიობის მიერ თავისი ჩვენების გასამყარებლად წარმოდგენილი პირდაპირი მტკიცებულებები უარყვეს.

"ამ დროის განმავლობაში ისეთი დამცირების წინაშე აღმოვჩნდი, რომ ამას მეორედ ვერ გადავიტან. ჩემი საჩივარი რომც დააკმაყოფილონ, საუკეთესო შედეგი სასამართლოს პროცესის ხელახლა ჩატარება იქნება, რომლის დროსაც ახალი ნაფიცი მსაჯულები მტკიცებულებებს შეაფასებენ. ამას მესამედ ვერ გავუძლებ", — განაცხადა მსახიობმა.

დეპის ადვოკატების თქმით, მორიგების პირობების მიხედვით, ამბერი ჯონის $1 მილიონს გადაუხდის.

ამავე თემაზე:

ნახეთ ამბერ ჰერდისა და ჯონი დეპის შესახებ გადაღებული ფილმის ტრეილერი