4 თვე გავიდა მას შემდეგ, რაც ჯონი დეპმა ამბერ ჰერდის წინააღმდეგ სასამართლო მოიგო. გახმაურებული სასამართლო პროცესების შესახებ ახალი ფილმი Hot Take: The Depp/Heard Trial უკვე გადაიღეს და პირველი ტრეილერიც გამოვიდა. ფილმში ჯონი დეპის როლს მარკ ჰაპკა ასრულებს, ხოლო მეგან დევისი ამბერ ჰერდს განასახიერებს.

ტრეილერში ვხედავთ, რომ მარკ ჰაპა ზუსტად ისე გამოიყურება, როგორც ჯონი დეპს სასამართლო პროცესებზე ვხედავდით. გარდა ამისა, მაყურებელი იმ ფრაზებსაც მარტივად იცნობს, რომლებიც სასამართლო პროცესებზე გაჟღერდა, შემდეგ კი ინტერნეტში ვირუსულად გავრცელდა. ტრეილერში ამბერ ჰერდის მიმართ სოციალური მედიის დამოკიდებულებასაც ვხედავთ და ასევე ნახსენებია ჯეიმს ფრანკოც, რომელიც ამბერ ჰერდის მოწმეთა სიაში იყო, თუმცა პროცესზე ჩვენების მისაცემად არ გამოუძახებიათ.

"ეს ჯონი დეპისა და ამბერ ჰერდის სასამართლო პროცესის პირველი დღეა. მიუხედავად იმისა, რომ გულშემატკივრები მხარს ორივეს უჭერენ, აქ აშკარა ფავორიტს ვხედავთ", — ვისმენთ ფილმის ტრეილერში, რაც ჯონი დეპის ფანებზე მიუთითებს, რომლებიც მსახიობის სანახავად სასამართლოს შენობის გარეთ ღამეებსაც ათენებდნენ.

ფოტო: Tubi

შეგახსენებთ, რომ ჯონი დეპმა ამბერ ჰერდის წინააღმდეგ სასამართლო მოიგო. ჯონი დეპმა ყოფილ ცოლს, ამბერ ჰერდს ცილისწამებისთვის უჩივლა და ზიანის ასანაზღაურებლად $50 მილიონი მოითხოვა. ჰერდმა 2018 წელს The Washington Post-ში გამოაქვეყნა ოპ-ედი, სადაც განაცხადა, რომ ოჯახში ძალადობის მსხვერპლი იყო. ამბერს ტექსტში ყოფილი ქმრის სახელი არ უხსენებია, თუმცა დეპის სარჩელში აღნიშნულია, რომ ოპ-ედი სწორედ მას ეხებოდა, რის გამოც მისი კარიერა დაზიანდა და როლები დაკარგა.

Hot Take: The Depp/Heard Trial-ის პრემიერის თარიღი უკვე ცნობილია და ფილმს მაყურებელი 30 სექტემბერს იხილავს.