კრისტოფერ ნოლანის ახალი ფილმის, Oppenheimer-ის, ნახვა მაყურებელს 2023 წლის 21 ივლისიდან შეეძლება და ახლახან გავრცელებული ტრეილერით თუ ვიმსჯელებთ, შთამბეჭდავი სანახაობაც ელის. ოპენჰაიმერი თეორიტიკოს-ფიზიკოსისა და "ატომური ბომბის მამის" სახელით ცნობილ ჯ. რობერტ ოპენჰაიმერის ცხოვრებაზე მოგვითხრობს, რომლის როლსაც ფილმში არც მეტი, არც ნაკლები კილიან მერფი თამაშობს. ისევე, როგორც კილიანის, ემილი ბლანტის, მეთ დეიმონის, რობერტ დაუნი უმცროსის, რემი მალეკისა და ფლორენს პიუს ფანებსაც სასიამოვნო ივლისი ელით, ვინაიდან ოპენჰაიმერში ყველა მათგანის ნახვის ბედნიერება გვექნება.

ფილმი შთაგონებულია კაი ბერდისა და მარტინ ჯ. შერვინის წიგნით: ამერიკელი პრომეთე: ჯ. რობერტ ოპენჰაიმერის ტრიუმფი და ტრაგედია, რომელმაც პულიცერის პრემია დაიმსახურა. წიგნი ოპენჰაიმერის მთელ ცხოვრებაზე მოგვითხრობს ბავშვობიდან გარდაცვალებამდე. განსაკუთრებული ყურადღება კი ეთმობა 1939-1945 წლებს, როცა ოპენჰაიმერი ატომური ბომბის შექმნასთან დაკავშირებულ სამუშაოებს და შემდგომში ბომბის გამოცდას ხელმძღვანელობდა.

"ჩვენ წარმოვიდგენთ მომავალს და ჩვენი წარმოსახვა გვაშინებს," — გვესმის ფილმის ტრეილერში. —"მათ არ შეეშინდებათ მისი, სანამ არ მიხვდებიან, რასთან აქვთ საქმე, და ვერ მიხვდებიან, რასთან აქვთ საქმე, სანამ არ გამოიყენებენ მას. მხოლოდ თეორიული ცოდნა ძალიან შორს ვერ წაგიყვანს. არ ვიცი, მზად ვართ, თუ არა იმისთვის, რომ ასეთი იარაღი გვანდონ, თუმცა სხვა გზა არ გვაქვს. ნეტავ, ოდესმე ვინმე თუ იტყვის სინამდვილეში აქ რაც ხდება?" — კითხულობს ოპენჰაიმერი.

ოსკაროსან რეჟისორს აქამდე ბიოგრაფიული დრამა არ გადაუღია, თუმცა ეს მისი მე-12 ფილმია, რომლის ხანგრძლივობა 2 საათი და 30 წუთი იქნება.

ამავე თემაზე:

5 რამ, რაც ნოლანის ვარსკვლავურ ოპენჰაიმერზე უნდა იცოდეთ

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...