საფრანგეთის ახალი პრეზიდენტი ემანუელ მაკრონი აშშ-ს პრეზიდენტის, დონალდ ტრამპის, გადაწყვეტილებას გამოეხმაურა, პარიზის კლიმატის ცვლილების შეთანხმების დატოვების შესახებ.

მაკრონმა გამოსვლა ფრანგულ ენაზე დაიწყო, თუმცა მოგვიანებით ინგლისურად განაგრძო საუბარი და ტრამპის წინასაარჩევნო ლოზუნგის (გავხადოთ ამერიკა ისევ დიდებული) ინტერპრეტირებული ვერსია გააჟღერა.

"კლიმატს გეგმა ბ არ აქვს, რადგან არ არსებობს პლანეტა ბ. ეს შეცდომაა, როგორც ამერიკისთვის, ისე ჩვენი პლანეტისთვის".

მაკრონმა იმ ამერიკელ მეცნიერებს და უბრალო მოქალაქეებს, რომლებიც ტრამპის გადაწყვეტილებით იმედგაცრუებულნი დარჩნენ, საფრანგეთში თავშესაფარი შესთავაზა:

"მათთვის საფრანგეთი ახალი სამშობლო იქნება. მე მათ ვუხმობ, ჩამოვიდნენ და იმუშაონ ჩვენთან ერთად კლიმატის ცვლილების პრობლემის გადასაჭრელად. სადაც არ უნდა ვცხოვრობდეთ, ვინც არ უნდა ვიყოთ, ჩვენ ერთი პასუხისმგებლობა გვაერთიანებს, გავხადოთ ჩვენი პლანეტა უფრო დიდებული".

ეს პირველი შემთხვევა იყო, როდესაც ელისეის სასახლიდან ემანუელ მაკრონმა განცხადება ინგლისურ ენაზე გაავრცელა.