პარტია ევროპული საქართველოს და მისი ერთ-ერთი ლიდერის გივი თარგმაძის მტკიცებით, პრემიერ-მინისტრი, გიორგი კვირიკაშვილი თავიდან ბოლომდე საქმის კურსში იყო აფგან მუხტარლის თბილისიდან აზერბაიჯანში გადაყვანის ოპერაციასთან დაკავშირებით. მისივე მტკიცებით, უშუალოდ ოპერაცია სუს-ის სპეც-რაზმის ხელმძღვანელმა, ზურა ხარაზიშვილმა შეასრულა, ორ სპეცრაზმელთან ერთად:

"ყველაფერი დაიწყო იქედან, რომ უჩა მამაცაშვილის პარტნიორმა აზერბაიჯანული მხრიდან, რომელსაც პრობლემები აქვს საერთაშორისო სამართალთან და ემუქრება დაკავებული პოზიციებიდან გაწევა აზერბაიჯანში, ჩათვალა, რომ ასეთი საქციელით საჩუქარს გაუკეთებდა საკუთარ ხელმძღვანელობას და სთხოვა უჩა მამაცაშვილს ქართველი ძალოვანი სტრუქტურების დახმარება იმაში, რომ ეს ჟურნალისტი რამენაირად გადაეყვანათ აზერბაიჯანის ტერიტორიაზე. უჩა მამაცაშვილმა, თავის მხრივ, ვინაიდან არ სურს პარტნიორის ცვლილება, მისცა ამის საშუალება, მისი ნდობით აღჭურვილი პირი შეახვედრა სუს-ის უფროსს, ვახტანგ გომელაურს. გომელაურმა ამ შეხვედრაზე დაისწრო მისი მოადგილე, სოსო გოგაშვილი და საბოლოო ჯამში, ხელმძღვანელობა ამ ოპერაციაზე ჩაბარდა სწორედ სოსო გოგაშვილს. სახელმწიფო თავის ფუნქციებს ვერ ასრულებს ვერც ერთი მიმართულებით," - განაცხადა თარგამაძემ.

29 მაისს, თბილისიდან გაიტაცეს აფგან მუხტარლი, აზერბაიჯანის ხელისუფლების მიერ დევნილი ჟურნალისტი, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან გაუჩინარდა, მოგვიანებით კი აღმოჩნდა, რომ ის აზერბაიჯანშია დაპატიმრებული. მუსტაფაევას აინტერესებს, როგორ გადაკვეთა მუხტარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხტარლიმ აზერბაიჯანში ადვოკატს უთხრა, რომ ის ნაცემია. 31 მაისს, აზერბაიჯანის სასამართლომ აფგან მუხტარლის სამთვიანი წინასწარი პატიმრობა შეუფარდა.