გიული ალასანიამ განცხადება ვივამედიდან გამოსვლისას, მიხეილ სააკაშვილის მონახულების შემდეგ გააკეთა.

რატომ არის მნიშვნელოვანი: დღეს, პირველ დეკემბერს, ცენტრმა ემპათიამ ყოფილი პრეზიდენტის ჯანმრთელობის მდგომარეობაზე დასკვნა გამოაქვეყნა.

  • დასკვნაში სააკაშვილის ჯანმრთელობის მდგომარეობა ფიზიკური/ფსიქიკური ტრავმებისა და შედეგების გათვალისწინებით, მძიმე ხარისხის დაზიანებად ფასდება.
  • ცენტრის განცხადებით, ყოფილი პრეზიდენტის პატიმრობიდან გათავისუფლების საფუძველი არსებობს.
  • სასჯელისგან გათავისუფლების შუამდგომლობით ადვოკატმა შალვა ხაჭაპურიძემ სასამართლოს უკვე მიმართა.

დეტალები: გიული ალასანია აცხადებს, რომ მისი შვილი ქართველებს და საქართველოს ხელისუფლებას მოწამვლაში არ ადანაშაულებს და ამბობს, რომ თუ სასიკვდილო მოწამვლა მართლაც შედგა, ეს იმ უცხო სახელმწიფოს კვალი და სტილია, რომელიც, მის შვილს მტრად მიიჩნევს.

  • ალასანიამ აღნიშნა, რომ ეს არის პროვოკაცია ქართული სახელმწიფოს წინააღმდეგ.
  • მან ყველას მოუწოდა პოლიტიკური მიზნით ხელის გაშვერისკენ თავი შეიკავონ.
  • "ჩემი შვილის გაუარესებულ ჯანმრთელობაზე პოლიტიკური ქულების დაწერისაგან თავის შეკავებას გთხოვთ. აქ წყდება ჩემი შვილის სიცოცხლე-სიკვდილის საკითხი და ყველას ვთხოვ, დედის პოზიციას ყურადღებით მიუდგებიან და მაქსიმალური თავშეკავება გამოავლინონ", — ამბობს ალასანია.
  • გარდა ამისა, ალასანიამ თქვა, რომ მისი შვილი არ აპირებს "ქართულ პოლიტიკაში მონაწილეობის გაგრძელებას".
  • "იმედი მაქვს, სამართლიანი გადაწყვეტილების. და გვახსოვდეს, რომ ყოველგვარი სპეკულაცია ვნებს ჩემი შვილის ისედაც ძალზე გაუარესებულ ჯანმრთელობას და გთხოვთ, პატივი სცეთ ჩემი შვილის და ჩვენი ოჯახის ღირსებას", — თქვა ალასანიამ.