ფლორიდელი ქალი ყველის მწარმოებელ კომპანია Velveeta-ს უჩივის, რადგან მაკარონის ყველთან ერთად მომზადებას იმაზე მეტი დრო დასჭირდა, ვიდრე შეფუთვაზე ეწერა. ქალი კომპანიისგან 5 მილიონს ითხოვს და მან სასამართლოში საჩივარი უკვე შეიტანა.

მომჩივანი ამანდა რამირესის თქმით, Velveeta-ს შეფუთვაზე ეწერა, რომ მაკარონის ყველთან ერთად მოხარშვას 3 წუთი და 30 წამი დასჭირდებოდა, თუმცა ამ პროცესმა გაცილებით დიდი დრო წაიღო. ამიტომ ქალი კომპანიისგან ზარალის ანაზღაურებას ითხოვს.

რამირესი სარჩელში წერს, რომ კომპანიას მომხმარებლები შეცდომაში შეჰყავს და რეალურად პროდუქტის მომზადებას 4 ნაბიჯი და მეტი დრო სჭირდება. რამირესის თქმით, Velveeta პროდუქტის შესახებ მას და ყველა სხვა მომხმარებელს არასწორ წარმოდგენას უქმნის.

"ჩვენ უკვე გვაცნობეს ამ არასერიოზული სარჩელის შესახებ და საჩივარში მითითებული ბრალდებებისგან თავს აუცილებლად დავიცავთ", — განაცხადა Velveeta-ს წარმომადგენელმა.

სასამართლომ რამირესის სარჩელი უკვე მიიღო, თუმცა ამ ეტაპზე საქმის განხილვის თარიღი უცნობია.