Mac Lethal სხვა რეპ არტისტებისგან განსხვავებით მსოფლიო ვარსკვლავი არ არის, მაგრამ მისი ვიდეოები და სიმღერები Youtube-ზე ძალიან პოპულარულია. მის შემოქმედებას ჯამში 120 მილიონი ნახვა აქვს.

მისმა ერთ-ერთმა თაყვანისმცემელმა, 11 წლის აიზეკმა, მას თავისი დაწერილი ტექსტი გაუგზავნა და სთხოვა გაერეპა.

ტექსტი აიზეკისა და მისი კლასელის ტომასის ურთიერთობის შესახებ მოგვითხრობს.

"ძვირფასო Mac Lethal,

მე შენი დიდი თაყვანისმცემელი ვარ და ვფიქრობ, ალბათ, ამ წერის არც წაიკითხავ, მაგრამ თუ წაიკითხავ, ერთი სათხოვარი მაქვს...

მე და ჩემი საუკეთესო მეგობარი ტომასი ერთად გავიზარდეთ, ერთ ქუჩაზე ვცხოვრობდით... უფრო სწორად, ჩემი ყოფილი საუკეთესო მეგობარი. ახლა მას ვძულვარ და როცა მხედავ ყოველთვის მჩაგრავს და შეურაცხყოფას მაყენებს. მთელი სკოლა ჩემს წინააღმდეგ აამხედრა და ყველა მე მერჩის. ყოველთვის ყველაფერზე დამცინიან, ლაპარაკის მანერაზე, სიარულზე და ა.შ. მე ყველას კეთილად ველაპარაკები, მაგრამ ისინი სასტიკად მეპყრობიან. მხოლოდ რამდენიმე მეგობარი მყავს, რომლებიც გვერდით მიდგანან.

დავწერე ტექსტი, რომელიც ამ ყველაფერს ეხება, თვითონ ვერ ვიმღერებ, მრცხვენია და გთხოვ, იქნება შენ გარეპო", ვკითხულობთ წერილში.

როგორც ტექსტიდან ირკვევა, ტომასმა აიზეკთან მეგობრობა მოულოდნელად შეწყვიტა. ერთ-ერთ სტრიქონში, აიზეკი ვარაუდს გამოთქვამს, იმიტომ ხომ არ ამითვალწუნე, რომ Call of Duty: Modern Warfare-ზე ვთქვი ცუდი თამაში იყოო და ტომასს შერიგებას და ამ თამაშის ერთად თამაშს სთავაზობს.

სიმღერაში მოთხრობილია, რომ ტომასი ხშირად აყენებს მას შეურაცხყოფას, სხვების დასანახად ჩაგრავს და ამით თავის ახალ მეგობრებს აცინებს.