ახალგაზრდა იურისტთა ასოციაციის იურისტის, სულხან სალაძის თქმით, აზერბაიჯანელი ჟურნალისტის საქმით, კითხვის ნიშნის ქვეშ დადგა ის, რომ საქართველო უსაფრთხო ქვეყნად მიიჩნეოდა:

"ეს შეიძლება ძალიან მძიმედ დაუბრუნდეს უკან საქართველოს და საუბარი იმაზე, რომ საქართველო არის დაცული და რეგიონში საჩვენებელი ქვეყანა, კითხვის ნიშნის ქვეშ დგას".

სალაძე ასევე ამბობს, რომ არ აქვს მნიშვნელობა, აფგან მუხთარლი ქართული თუ სხვა ქვეყნის სპეცსამსახურების მონაწილეობით მოიტაცეს, ფაქტია ის, რომ ხელისუფლებამ უნდა გასცეს პასუხი, პასუხისმგებელია თუ არა საქართველოს და უცხო ქვეყნის მოქალაქეთა უსაფრთხოებაზე:

"როგორ მოხდა, რომ მან პასპორტის გარეშე დატოვა საქართველო და ძალიან დიდი ალბათობაა იმისა, რომ იგი გახდეს წამების მსხვერპლი".

აფგან მუხთარლი აზერბაიჯანის ხელისუფლების მიერ დევნილი ჟურნალისტია, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან 29 მაისს დაიკარგა, მოგვიანებით კი აღმოჩნდა, რომ ის აზერბაიჯანშია დაპატიმრებული საზღვრის უკანონოდ კვეთის ბრალდებით. მუსტაფაევას თქმით, მას აინტერესებს, როგორ გადაკვეთა მუხთარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხთარლიმ აზერბაიჯანში ადვოკატს უთხრა, რომ ის ნაცემია.

საქართველოს შინაგან საქმეთა სამინისტრო ამბობს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს, თუმცა, ჯერ არ განუმარტავთ, როგორ აღმოჩნდა თბილისში დაკარგული ჟურნალისტი ბაქოს ციხეში. აფგან მუხთარლში ჯერ კიდევ რამდენიმე დღის წინ ამბობდა, რომ აზერბაიჯანის ხელისუფლების მიერ დევნილ პირებს საქართველოში საფრთხე ემუქრებათ, რადგან მათ თავშესაფარს არ აძლევენ და უკან, აზერბაიჯანში აბრუნებენ, სადაც წამება და მრავალწლიანი პატიმრობა ელოდებათ.