ამის შესახებ შალვა ხაჭაპურიძემ ჯორჯიან თაიმსის ეთერში გუშინ, 7 ნოემბერს ისაუბრა.

რატომ არის მნიშვნელოვანი: ბოლო პერიოდია, სააკაშვილის ოჯახის წევრები და ადვოკატები ექსპრეზიდენტის ჯანმრთელობის მდგომარეობის გაუარესებაზე აქტიურად საუბრობენ.

  • ხაჭაპურიძის თქმით, დემენცია ერთ-ერთია დიაგნოზების იმ ჩამონათვალიდან, რაც ყოფილ პრეზიდენტს აქვს.
  • მოგვიანებით, სააკაშვილის ადვოკატმა ინტერპრესნიუსთან თქვა, რომ ორივე დიაგნოზი სავარაუდოა.

დეტალები: ადვოკატის ინფორმაციით, ტუბერკულოზის ჩხირზე პასუხი გერმანიიდან მიიღეს.

  • "დღეს დაუდგინდა ტუბერკულოზის ჩხირი. თქვენ რას ფიქრობთ, რომ სააკაშვილი საქართველოში ტუბერკულოზით შემოვიდა? მეეჭვება, რომ ტუბერკულოზით შემოსულიყო", — აცხადებდა ხაჭაპურიძე.
  • ჟურნალისტის კითხვაზე, ადანაშაულებს თუ არა კლინიკა ვივამედს იმაში, რომ სააკაშვილს ტუბერკულოზის ჩხირი აღმოაჩნდა, ადვოკატი ასე პასუხობს: "ვივამედამდე მე-12-ში იჯდა, მე-18-ში იჯდა, გორის ჰოსპიტალში იჯდა, არ ვიცი, სად დაემართა".
  • როგორც ხაჭაპურიძე გუშინ მედიასთან ამბობდა, ამის შესახებ ჯერ სააკაშვილიც არ იყო ინფორმირებული.

დღეს, 8 ნოემბერს სააკაშვილის ადვოკატმა ინტერპრესნიუსს უთხრა, რომ საუბარია არა დადასტურებულ, არამედ სავარაუდო დიაგნოზებზე.

  • "ჯერჯერობით საბოლოოდ დადგენილი არ არის, ველოდებით. ეს არის ეჭვი და ამ მიმართულებით მუშაობა მიმდინარეობს. ვგულისხმობ დემენციასა და ტუბერკულოზს და კიდევ 34 დაავადებაზეა საუბარი“, — აცხადებს ხაჭაპურიძე.