საქალაქო სასამართლოს გადაწყვეტილებაზე მოდავე მხარეები სოციალურ ქსელში წერენ.

რატომ არის მნიშვნელოვანი: 2017 წლის ივნისში აკა სინჯიკაშვილმა თეონა ბაღდავაძე საქველმოქმედო აქციის, "წითელი ცხვირების" კამპანიისგან მიღებული ფულის მითვისებაში საჯაროდ დაადანაშაულა.

  • როგორც ის ამბობდა, ბაღდავაძემ უთხრა, რომ გაიყიდა 15 000 "ცხვირი", შედეგად კი 75 000 ლარი შეგროვდა.
  • წერდა, რომ ეს მოსალოდნელზე ნაკლები იყო, რადგან, "მთელ საქართველოს წითელი ცხვირები ეკეთა", ასევე, "იყიდებოდა მაისურები, კომპანიები იხდიდნენ სასპონსორო თანხებს".
  • ამავე პოსტში საუბრობდა იმაზეც, რომ შემოსული თანხიდან 35 000 ლარი მიიღო, ხოლო ბაღდავაძე ეჭვობდა, რომ სინჯიკაშვილმა სწორედ ეს თანხა გაფლანგა, რომელიც მას საქველმოქმედო მიზნებისთვის გადაეცა.
  • საქმის გამოძიებას ორივე მხარე ითხოვდა, თუმცა სინჯიკაშვილმა ფინანსთა სამინისტროს საგამოძიებო სამსახურს, ხოლო ბაღდავაძემ საქალაქო სასამართლოს მიმართა — ფინანსურმა პოლიციამ დავაში ბაღდავაძის დანაშაული ვერ დაინახა.

დეტალები: ბაღდავაძე ითხოვდა, რომ სინჯიკაშვილს მისთვის და Red Nose Day Georgia-სთვის ბოდიში მოეხადა და დღის ცენტრის ასაშენებლად მიღებული ფული დაებრუნებინა.

  • საქართველოს კანონმდებლობის მიხედვით ბაღდავაძეს სასამართლოში მოუწია იმის მტკიცება, რომ სინჯიკაშვილის მიერ გავრცელებული ბრალდებით მის საქმიან რეპუტაციას ზიანი მიადგა, რადგან სხვა შემთხვევაში სარჩელი არ დაკმაყოფილდებოდა.
  • 2018 წელს მან On.ge-სთან განაცხადა, რომ მორალური ზიანისთვის ის 5 ლარს ითხოვდა და ამბობდა: "რომ დავიწყო იმის გაზომვა რა სახის რეპუტაციული ზიანი მომადგა, რა თქმა უნდა, უკვე სხვა თანხებზე ავალთ".

რას ამბობენ მხარეები: ბაღდავაძე წერს, რომ სასამართლოს გადაწყვეტილებით, სინჯიკაშვილმა თანხა უკან უნდა დააბრუნოს და ეს ფული გამჭვირვალე საქველმოქმედო მიზნებს მოხმარდება.

  • მას არ უხსენებია, თუ რა გადაწყვეტილება მიიღო სასამართლომ რეპუტაციის შელახვის ნაწილში, თუმცა კომენტარებში დააზუსტა, რომ სასამართლომ არ დააკმაყოფილა მხოლოდ ის პუნქტი სადაც ცნობების უარყოფას ითხოვდა და დამატებით დეტალებს დაწერს, როცა დასაბუთებული გადაწყვეტილება ჩაბარდება.
  • სინჯიკაშვილის თქმით, სასამართლომ ის რეპუტაციის შელახვის ნაწილში სრულად გაამართლა.
  • "პროცესში აღმოჩნდა ისიც, რომ ბაღდავაძე არ ყოფილა Red Nose საერთაშორისო ორგანიზაციის არც ოფიციალური და არც არაოფიციალური წარმომადგენელი [...] რაც მთავარია, დამტკიცდა, რომ ტყუილად არავისთვის არაფერი დაგვიბრალებია და ერთი სიტყვაც ტყუილი არ მითქვამს, არც თქვენთვის და არც სასამართლოსთვის", — ამბობს ის.
  • სინჯიკაშვილი ადასტურებს, რომ თანხის დაბრუნების ნაწილში სასამართლომ ბაღდავაძეს მოთხოვნა დაუკმაყოფილა, თუმცა თანხის გადახდას არ აპირებს, რადგან, როგორც ის ამბობს, ამ ფულით და "ალბათ, კიდევ ორჯერ მეტით" მოხალისეების შენობა გახსნეს.
  • "აი, მაგ ჭკუაზე ვარ ახლა, ეს ამხელა ცენტრი დავხურო, ამდენი ათასი ადამიანის შრომა წყალში ჩავყარო და ეს თქვენი შეგროვილი ფული უკან დავუბრუნო", — წერს ის.
  • დამატებითი ინფორმაციის მიღებას On.ge მოდავეებისგან და სასამართლოსგან ცდილობს.