კანონპროექტს 80 მომხრე და 9 წინააღმდეგი ჰყავდა.

რატომ არის მნიშვნელოვანი: ევროკავშირმა საქართველოს მოლდოვისა და უკრაინისგან განსხვავებით, კანდიდატი ქვეყნის სტატუსი არ მიანიჭა — მისცა პერსპექტივა და 12 პუნქტიანი გეგმა.

  • ევროკომისიამ ასოცირებული ტრიოს სამივე ქვეყნისთვის გასცა დეოლიგარქიზაციის რეკომენდაცია და მოუწოდა, აღმოფხვრან ოლიგარქების გადაჭარბებული გავლენა ეკონომიკურ, პოლიტიკურ და საზოგადოებრივ ცხოვრებაზე.
  • მოლდოვისა და საქართველოს რეკომენდაციები ამ მიმართულებით იდენტურია, ხოლო უკრაინას დაევალა, უკვე მიღებული კანონის შესაბამისად, სამართლებრივად გამართულად იმუშაოს ამ საკითხზე.
  • ქართული ოცნება დეოლიგარქიზაციაზე უკრაინული კანონის ანალოგის წარდგენას გეგმავდა, რათა ამით "აეცილებინათ სპეკულაციები".
  • ოპოზიცია აცხადებდა, რომ შესაძლოა ამ კანონმა გამოიწვიოს რეპრესიები ხელისუფლების ოპონენტების წინააღმდეგ.

დეტალები: კანონპროექტი პლენარულ სხდომაზე პირველი მოსმენით, იურიდიულ საკითხთა კომიტეტის თავმჯდომარემ ანრი ოხანაშვილმა წარადგინა.

  • "აბსოლუტურად ობიექტურ პარამეტრებზე დაფუძნებული პროექტი, როგორც ეს აქვს უკრაინას მიღებული, გადმოვიტანეთ ქართულ საკანონმდებლო სივრცეში".
  • "თუკი, ევროპული სტრუქტურები, საითაც ჩვენ მივისწრაფვით, პრინციპებს და კანონის მიღებას დეოლიგარქიზაციაზე სწორად აფასებენ, მაშინ ჩვენ გვაქვს მოლოდინი, რომ საქართველოსთან მიმართებაში ეს იგივე შეფასებას დაიმსახურებს", — თქვა მან.

კანონპროექტით წესრიგდება ოლიგარქის ცნების განმარტება, პირის ოლიგარქად ცნობისა და შესაბამის რეესტრში შეყვანის, ოლიგარქის რეესტრიდან ამორიცხვისა და რეესტრის წარმოების საკითხები.

  • ასევე, პირის ოლიგარქად ცნობის სამართლებრივი შედეგები, გარკვეული პირების მიერ ოლიგარქსა და მის წარმომადგენლებთან კონტაქტის თაობაზე შესაბამისი დეკლარაციების შევსების საკითხები.

პროექტის მიხედვით, საზოგადოებრივ ცხოვრებაში მნიშვნელოვანი ეკონომიკური და პოლიტიკური ზონის მქონე პირად (ოლიგარქად) მიიჩნევა ფიზიკური პირი, რომელიც შემდეგი კრიტერიუმებიდან, სულ მცირე, სამ მათგან ერთდროულად აკმაყოფილებს:

  • პოლიტიკურ ცხოვრებაში მონაწილეობს;
  • მასობრივი ინფორმაციის საშუალებებზე მნიშვნელოვან გავლენას ახდენს;
  • არის იმ მეწარმე იურიდიული პირის საბოლოო ბენეფიციარი, რომელსაც ბაზარზე დომინანტური მდგომარეობა უკავია და რომელიც ამ მას 1 წლის განმავლობაში ინარჩუნებს ან აუმჯობესებს.